“Bakı” klubunun vitse-prezidenti Zeynal Məmmədovun müsahibəsi
– Zeynal müəllim, ilk öncə Rauf Əliyev və Kamran Ağayevin məsələsinə aydınlıq gətirməyinizi istərdim…
– İlk öncə onu deyim ki, Aqil Nəbiyevi artıq sıralarımıza qatmışıq. Kamran Ağayevlə danışıqlar aparmışıq. Bu transferə klubun prezidenti Hafiz müəllimdə öz razılığını verdi. Rauf məsələsi isə bir az müəmmalı oldu
.
– Konkret olaraq söhbət hansı müəmmadan gedir?
– Bilirsiniz necədir, “Qarabağ” rəhbərliyi Rauf Əliyevə deyib ki, gətir bu qədər pul ver, çıx get. Rauf da mənim yanıma gələrək onların istəyini dedi. Mən də onunla razılaşdım. Telefonu götürüb zəng edirəm “Qarabağ”a, deyirlər ki, biz belə söz deməmişik. Çünki Raufun o sözü, pulun miqdarını deməyə ixtiyarı yoxdur. "Qarabağ"dan mənə Rauf Əliyevə ilk dəfə söylədikləri qiymətin bir o qədərini də üstünə qoyub dedilər. Nəysə onlar düz arşın oynatmırlar. Mən onlara zəng edib, hələ demək istəyirdim ki, bizim üçün qiymətdə bir qədər enidirim etsinlər. Onlar da məbləğdə aşağı düşmək əvəzinə, mənə "qiymət oxuyur"lar. Dedim, sizə ayıb olsun. Mənə lazım deyil. O Rauf, o da siz.
– Belə çıxır ki, Rauf məsələsi hələlik sual olaraq qalır?
– Sual olaraq qalır deyəndə ki, klub düzgün etmir. Əvvəlcə, bir qiymət deyib yola salıb, sonra başqa bir şey demək düzgün deyil. Şəxsən mən bunu özümə yaraşdırmaram. Peşəkarlıqdan da əlavə, insanlıq amili var. Bu futbolçu yerli və milli komandanın futbolçusudur. Ona qarşı belə etmək yaraşmaz. Deyiblər, gətir bu pulu ver, get.
– Bəs Rauf Əliyev özü bu məsələyə necə yanaşır?
– Onunla hər məsələdə razılaşmışıq. Rauf Əliyevin ürəyi hazırda “Bakı” klubundadır. Sadəcə, hələlik "Qarabağ" klubu ilə razılığa gələ bilmirik. Gördüm ki, alınmır, Raufa zəng etdim və söylədim ki, rəhbərlik belə deyir. "Get işini klubunla həll et, gəl". Qapımız sənin üzünə hər zaman açıqdır.
– Bəs Kamran Ağayevin keçidini “Xəzər Lənkəran”la həll etdiniz?
– Bəli, bu klubla danışmışıq. Sağ olsun, Mais Mənsimov dedi ki, Kamran məndən nə alıbsa, bu mövsüm üçün qaytarsın. Ürəyi hansı kluba getmək istəyirsə, getsin. Kamran da dedi ki, bu qədər almışam. Mən də dedim ki, danışdıq. İndi o pulu Kamranın yerinə mən verəcəyəm. Lakin sonra pulundan çıxacağam. Demək olar ki, Kamran artıq “Bakı”nın futbolçusudur. Lakin hələ ki, şifahi razılığa gəlinib. Ancaq gec-tez bu transfer rəsmi həll olunacaq.
– Bu mövsüm üçün komandanın ilk”altılığ”a və Avroliqaya vəsiqə qazanmaq şanslarını necə görürsünüz?
– Görəcəksiniz, biz sözümüzü hələ deyəcəyik. “Bakı” klubunu pisləyənlər yenə də yanılacaqlar. Ötən ildə heç kəs bizim Avroliqaya vəsiqə qazanacağımıza inanmırdı. Lakin biz bunu sübut etdik. Bizi mükafatçılar sırasından silmək hələ tezdir. Özü də çox tezdir. "Bakı"nın hər iki yarışmada uğur qazanmaq şansı var.
futbolmedia.az
