Bu gün AFFA İntizam Komitəsinin növbəti iclası keçirilib.
Korner.az-ın AFFA-nın rəsmi saytına istinadən verdiyi məlumata görə, tədbirdə “Xəzər Lənkəran” klubunun Azərbaycan Premyer Liqasının IV turunun “Xəzər Lənkəran” – “İnter” matçında Lənkəran təmsilçisinin futbolçusu Qalin İvanova göstərilmiş sarı vərəqənin düzgün olmadığı və həmin vərəqənin ləğv olunması ilə bağlı Apellyasiya və Ekspert Komitəsinə müraciətinə baxılıb.
Apellyasiya və Ekspert Komitəsi bu məsələyə baxılması üçün İntizam Komitəsinə müraciət edib. İntizam Komitəsi matçın videoyazısına baxdıqdan və AFFA Hakimlər Komitəsinin sədrinin bu epizodla bağlı rəyindən sonra aşağıdakı qərar qəbul olunub:
Azərbaycan Premyer Liqasının IV turunun “Xəzər Lənkəran” – “İnter” matçının 59-cu dəqiqəsində “Xəzər Lənkəran” klubunun 8 nömrəli futbolçusu Qalin İvanova göstərilmiş sarı vərəqə hakim tərəfindən epizod düzgün qiymətləndirilmədiyinə görə ləğv edilib.
