Uruqvayın paytaxtı Montevideo şəhərində qadınlardan ibarət 18 komandanın iştirak etdiyi "Qızıl kubok – Azərbaycan çempionatı 2012" adlanan futbol turniri keçirilib.
Korner.az-ın AFFA-nın rəsmi saytına istinadən verdiyi məlumata görə, Uruqvay Futbol Assosiasiyasının təşkilatçılığı ilə keçirilən turnirin qalibi "Kerre" komandası olub. Qaliblərin mükafatlandırılma mərasimində ölkəmizin Argentina və Uruqvaydakı səfirliyinin nümayəndələri iştirak edib.
Mərasimdə çıxış edən Uruqvay Futbol Assosiasiyasının qadın futbolu şurasının prezidenti Nair Akerman Boxard bildirib ki, turnirin "Qızıl kubok – Azərbaycan çempionatı 2012" adlandırılması bu il Azərbaycanda təşkil olunmuş və ilk dəfə olaraq Uruqvay yığmasının çıxış etdiyi FIFA U-17 qadınlararası dünya çempionatı ilə bağlıdır. O, vurğulayıb ki, Uruqvay yığması Azərbaycandan xoş təəssüratlarla ayrılıb və göstərilmiş qonaqpərvərliyə görə minnətdarlığını bildirib.
Azərbaycanın Argentina və Uruqvaydakı səfirliyinin nümayəndələri turnirin adında ölkəmizin qeyd olunmasına görə təşkilatçılara təşəkkür edib və qaliblərə təbriklərini çatdırıb. (AFFA)