Ukraynalı futbol azarkeşləri macarıstanlı referi Viktor Kaşşainin “Vikipediya”dakı səhifəsinə hücum ediblər.
Buna Kaşşainin Avropa çempionatının qrup mərhələsinin son turunda Ukrayna yığmasının İngiltərənin qapısına vurduğu qolu hesaba almaması səbəb olub.
Görüşdən dərhal sonra “Vikipediya”nın Ukrayna dilində olan saytında hakimin amansızlıqla qətlə yetirilməsi, habelə, onun qeyri-ənənəvi seksual orientasiyaya malik olması barədə məlumat yerləşdirilib. Sayt adminləri ilkin mətni bərpa ediblər. Lakin inadkar fanatlar xəbəri yenidən əlavə ediblər.
“Vikipediya”nın ingilisdilli səhifəsində isə Kaşşainin ukraynalı fanatların əli ilə öldürülməsi və meyitinin itlər tərəfindən məhv edilməsinə dair xəbərlər yer alıb. Bu xəbər də 15 dəqiqədən sonra çıxarılıb. Rusdilli səhifədə isə hakimə “Kor”, “London fahişəsi” kimi epitetlər qoşulub və o, qeyri-müəyyən müddətə “istefaya göndərilib”.
Qeyd edək ki, İngiltərə ilə oyunun 62-ci dəqiqəsində macarıstanlı baş hakim Viktor Kaşşai ukraynalı Marko Deviçin vurduğu təmiz qolu hesaba almayıb. Con Terri topu qapı xəttinin tam içərisindən çölə çıxarsa da, qapı arxasındakı hakim bunu görməyib. Bütün oyun ərzində hücum futbolu sərgiləməsinə baxmayaraq, Ukrayna nəinki qələbəyə, hətta heç-heçəyə də nail ola bilməyib. Əvəzində İngiltərə qrup lideri kimi ¼ finala yüksəlib.
Xəbər: Lent.az
![](https://korner.az/wp-content/uploads/2018/06/korner-logo.png)