Tərlan Əhmədov: “Bu qədər fasilədən sonra gözəl futboldan danışmaq tezdi”
10.06.2020 , 20:35
“Neftçi” ilə “Keşlə” arasında baş tutan yoxlama oyunundan (3:1) sonra keçirilən mətbuat konfransında “Keşlə”nin baş məşqçisi Tərlan Əhmədov fikirlərini bildirib.
Korner.az xəbər verir ki, mütəxəssis məğlubiyyəti belə şərh edib:
“İşimizə başlamaq xoşdu. Amma bu gün futbolçulardan nəsə tələb etmək düzgün deyil. 8 gündü məşqlərə başlamışıq. Çalışmışıq ki, futbolçuları topa uyğunlaşdıraq. Səhvlər var, bunun üzərində iş gedir. Komandanın oyunundan razı qaldım. Fasilədən sonra fərqli oynadıq, rəqibə təzyiq etdik. Baxımlı futbol gözləmək düzgün deyil. Bu qədər fasilədən sonra gözəl futboldan danışmaq üçün tezdi. Futbolçuların psixoloji bariyeri aşa bilmədiyi hiss olunurdu”.
