"Xəzər Lənkəran”ın xorvatiyalı futbolçusu Roberto Alvizin müsahibəsi
– Komandanızın cari mövsümdə çıxışına necə qiymət verərdiniz?
– Artıq 1 ilə yaxındır “Xəzər Lənkəran”dayam və özümü yaxşı hiss edirəm. Onu deyə bilərəm ki, komandamın uğurları üçün meydanda sona kimi çalışıram. İstəyirəm “Xəzər Lənkəran” həmişə qalib gəlsin, yüksək yerlərə qalxsın. Meydana bu istəklə çıxıram. Düzdür, “altılığ”a düşə bilmədik. Ancaq futbolda belə şeylər olur. Eybi yoxdur, kubokda iddiamızı davam etdiririk. Fikrimcə, mövsümü yaxşı başa vurmağa şansımız var.
– Çempionatda mükafatçılar sırasına düşmək şansınız olmadığından, ikinci “altılıq”da oynamaq motivasiyanızı azaltmır ki?
– Bunun bizim üçün fərqi yoxdur. “Altılığ”a düşmədinsə, bu, motivasiyanı azaltmamalıdır. Bu biz futbolçuların işidir və hər gün bunun üçün məşq edirik.
– “Xəzər Lənkəran” artıq 3 oyundur qalib gələ bilmir. Bunun səbəbini nədə görürsünüz?
– AZAL-la son matçda komandamız yaxşı oynadı. Üstünlük bizdə idi, qol imkanlarımız çox oldu. Sadəcə, bundan lazımınca istifadə edə bilmədik.
– Qışda komandanıza həmyerliniz Marin Orsuliç gəldi ki, o da sizin kimi yarımmüdafiənin mərkəzində oynayır. Nəticədə əsas heyətə düşmək uğrunda rəqabətin yüksəlməyi sizi narahat etmir?
– Sevinirəm ki, komandanıza Xorvatiyadan daha bir futbolçu gəldi. Çünki bu, bizim ölkə üçün də yaxşıdır. Yəni, biz bura gəlməklə Xorvatiyanı reklam elədik. İstərdim “Xəzər Lənkəran”a və digər Azərbaycan komandalarına da ölkəmizdən futbolçular gəlsin. Mən yenə öz işimi yaxşı görürəm. Kimin oynamağının fərqi yoxdur.
– Siz bu müddətdə Lənkəran klubunda artıq 3-cü baş məşqçi illə işləyirsiniz. Uelsli Con Toşaka qədər yerli mütəxəssis Yunis Hüseynov və ispaniyalı Karles Martorell Bakesin rəhbərliyi altında oynamısınız. Qısa müddətdə tez-tez baş məşqçi dəyişikliyi sizə necə təsir edir?
– Hər məşqçinin öz iş üslubu, futbola baxışı var. Oyunçular daim məşq etməlidir, kimin oynamağına isə baş məşqçi qərar verəcək. Bunadək işlədiyim baş məşqçilər komandamızın yuxarı qalxmağını istəyirdi, həmişə qalib gəlməyini istəyirdi. Mən sabiq çalışdırıcılarım haqda heç bir pis şey deyə bilmərəm. Onlar yaxşı məşqçilərdir.
– Bəs Toşakı necə xarakterizə edərdiniz?
– Təbii ki, çox tanınmış məşqçidir. Futbolu yaxşı bilir və oyunçuların meydanda öz işlərini görməyi üçün taktikaya xüsusi fikir verir.
– O, qısa müddətdə komandada nəyi dəyişə bilib? Toşakda ən çox nə xoşunuza gəlib?
– Uelsi mütəxəssis cəmi 2 həftədir burdadır. Baş məşqçimizə vaxt lazımdır ki, komanda onun istədiyi kimi oynamağa başlasın. Toşakın ən çox xoşuma gələn cəhəti odur ki, futbolçuya məşqdə səhvini aradan qaldırmağa imkan verir. Hər oyunçu bir-birinə kömək edir. Toşak üçün bir məşqçi kimi ən əsas taktikadır.
– İndiyə kimi bir çox məşqçilərlə işləsəniz də, Toşak kimi tanınmışı olmayıb…
– Elədir. Mən karyeramda əvvəlki dövrlərdə yaxşı məşqçilərlə işləmişəm. Ancaq Toşak böyük adı olan mütəxəssisdir. Bu, təkcə mənim yox, bütün futbolçularımız üçündür. Mən 4-5 ölkə, çoxlu baş məşqçi dəyişmişəm. Ancaq belə tanınmış mütəxəssisin rəhbərliyi altında oynamamışam.
– Yəqin ki, bununla fəxr edirsiniz. Ancaq digər tərəfdən, Toşak növbəti mövsümdə yeni komandanı quranda güclü futbolçuları cəlb edəcəyini nəzərə almaq lazımdır. Necə düşünürsünüz, həmin vaxt sizin xidmətinizdə ehtiyac duyacaq?
– Mənim hələ 2 aylıq müqaviləm var. Rəhbərliklə gələcək taleyim haqda hələ danışmamışam. Bilmirəm ki, növbəti mövsümdə necə olacaq. Ancaq yüz faiz belə hesab edirəm ki, Toşak həmin vaxt güclü komanda yaradacaq və “Xəzər Lənkəran” çempionluğa oynayacaq.
– Buna qədərsə mövsümü titulu başa vurmaq baxımından kuboku qazanmaq lazımdır. Buna nail olmaq şansınız necədir?
– Düşünürəm ki, kubokda qalib istənilən halda 2 oyuna əsasən müəyyənləşəcək. Ən vacibi odur ki, ilk oyunda səfərdə topu çox itirməyib, imkan olsa 1 qol vuraq. Çünki kubokda rəqib meydanında vurulan 1 top 2-yə bərabərdir. Fikrimcə, komandamız həmin vaxt yığışıb, mərhələ keçmək üçün meydanda bütün gücünü qoyacaq. İnanıram ki, finala çıxa biləcəyik.
Yarımfinalda üzləşəcəyiniz “Bakı” bu il hələ uduzmayıb. Rəqibinizin hazırkı çıxışını necə dəyərləndirərdiniz?
– “Bakı” bizdən fərqli, ilk “altılıq”da oynayır. Bu, bizim üçün o mənada yaxşıdır ki, rəqibimizin daha çətin oyunlar keçirir. Bizdə isə çempionatda belə sınaq olmamağını üstünlük sayıram. “Bakı”nın daha çox güc sərf etməyi bir az işimizi asanlaşdırır. Lənkəran klubu bütün rəqiblərlə oyuna ciddi yanaşır və əsas ilk matçı yaxşı keçirməkdir. Cavab matçımızı evdə keçirəcəyik və onda stadionumuz azarkeşlərlə dolacaq.
apasport
