"Rəvan"ın uzun müddətdir zədəli olan futbolçusu Tpofiq Mikayılov artıq bərpa kursunu keçir.
Korner.az-ın məlumatına görə, futbolçu bu barədə klubun rəsmi saytına açıqlamasında deyib:
"İlk öncə klub rəhbərliyinə təşəkkürümü bildirirəm. Sağ olsunlar, mənə hər cəhətdən kömək etdilər, dəstək oldular. Elə komanda yoldaşlarıma da minnətdaram. Hamısı çətin vaxtımda yanımda oldular. Allah razı olsun hamısından. Bilirsiz, mən ilk dəfədir belə ağır zədə alıram. Zədə alan epizodda dərhal məsələnin ciddi olduğunu hiss elədim. Çünki dizim qatlandı. Dözülməz ağrılar hiss etdim. Ümumiyyətlə, heç bir idmançıya zədə arzulamıram. Uzun müddətdir oynaya bilmirəm. Kənardan komandanın çıxışını izləmək isə çətindir. Çünki özüm də meydana çıxmaq istəyirəm. Amma hələ bir qədər də səbr etməliyəm. Artıq yavaş-yavaş özümə gəlirəm. Şənbə günü reabilitasiya kursunu keçən həkim məni 5-10 dəqiqə qaçırdı. Şükür Allaha, heç bir ağrı hiss etmədim. Həkim deyib ki, inşallah bu ayın axırına stadionda qaça biləcəm. Yaşıl meydanlara nə vaxt qayıdacağımı isə dəqiq deyə bilmərəm. Zədənin tez sağalmağından çox şey asılıdır. Amma ümid edirəm ki, yanvar-fevral aylarına kimi tam düzələrəm”.
