“Rəqibi təbrik edirəm. Layiqli qələbə qazandılar. İlk hissənin əvvəlində həyəcan var idi. Müdafiədə səhvlərimiz məğlubiyyətimizi labüd etdi”.
Korner.az-ın sportnet.az-a istinadən yaydığı xəbərə görə, bu fikirləri AZAL-ın baş məşqçisi Tərlan Əhmədov Topaz Premyer Liqasının 3-cü turunda “Zirə”yə səfərdə 1:3 hesabı ilə uduzduqları oyundan sonra keçirilən mətbuat konfransında deyib.
O, məğlub olmalarına baxmayaraq, futbolçularının çıxışından narazı qalmayıb:
“Komandamızın oyunu var, çalışırlar. Futbolda bəzi səhvlər qaçılmazdır. Oyunçularıma iradım yoxdur. “Kəpəz”lə görüşdən sonra arxayınçılıq var idi. Yəqin ki, bu da mənim səhvim idi. Çatışmazlıqları fasilədə həll etməyə çalışacağıq”.
T. Əhmədov yarımmüdafiəçi İlqar Ələkbərov 2 oyundur meydana başısarıqlı çıxmasını belə izah edib:
“Onun başına tikiş qoyulmalı idi, amma özü razı olmadı. Yara hələ tam bitişməyib”.
“3 tura bir xal qazanmışıq. Komanda oyundan oyuna inkişaf edir. Qarşıda daha ağır oyunlar var. Çalışacam ki, mövsüm sonunda komandamız optimal formada olsun. Avqustun 23-dən məşqlərə başlayacağıq. 3 yoxlama görüşündə sınaqdan keçirməliyik” – deyə o bildirib.
