Mövsüm bitməmiş Omar Kalabane və Yannik Kamananla yollarını ayıran “Qəbələ” daha bir neçə legioneri ilə vidalaşmağa hazırlaşır.
Korner.az-ın məlumatına görə, kubokun finalından sonra ən azı 5 əcnəbi futbolçu komandanı tərk edəcək.
Gedənlərdən ikisi Syominin ölkəmizə gətirdiyi futbolçulardı. Belə ki, rus mütəxəssis Leonardo da Silva və Abdulvahid Afolabinin getməsini istəyir. Qış fasiləsinədək oyunu ilə özündən söz etdirən Leo istirahətdən gec dönməklə intizamsızlıq etdi. Daha sonra isə əvvəlki oyununu sərgiləyə bilmədi. “Qəbələ”nin heyətində 30 oyuna çıxıb 2177 dəqiqə oynayan braziliyalı 8 qola imza atıb. Abdulvahid isə özünü heç cürə göstərə bilmədi. 22 yaşlı nigeriyalı Premyer Liqada keçirdiyi 21 oyunda 452 dəqiqə oynaya bilib və qol vura bilməyib.
Syominin qara siyahısındakı digər futbolçulara gəlincə, bunlardan ikisi braziliyalıdı. Belə ki, Lourival Assis və Dieqo Kosta komandanı tərk edəcək. Kosta bu mövsüm əsas zədələrlə mübarizə aparmalı olub və 9 oyunda meydana çıxıb. “Qəbələ”nin heyətində daha 3 qapıçı olduğundan 35 yaşlı braziliyalı yola salınacaq. Asisə isə Syomin güvənmir. Rus mütəxəssis ona bu mövsüm Premyer Liqanın 9 oyununda 288, kubokun 4 matçında 50 dəqiqə oynamaq şansı verib.
Komandanı tərk edəcək digər legioner Nikola Valentiçdi. Bosniyalı müdafiəçi Soyminə lazım deyil. Baş məşqçinin sonuncu dəfə martın 12-də “Qarabağ”la baş tutan kubok matçında meydana buraxdığı Nikola bu mövsüm Premyer Liqada 15 (956 dəqiqə), kubokda 2 (180 dəqiqə) oyun keçirib.
