Premyer Liqamızda mövsümün ikinci yarısına hazırlığını davam etdirən “Sumqayıt” bu gündən etibarən təlim-məşq toplanışına yığışıb.
Korner.az–ın klubun saytına istinadən yaydığı xəbərə görə, Aqil Məmmədovun rəhbərlik etdiyi komanda sabahdan etibarən gündə iki dəfə olmaqla məşqlərini “Kapital Bank Arena”da keçirəcək.
Təlim-məşq toplanışı çərçivəsində “Sumqayıt” bu gün ilk yoxlama oyununu keçirib. Doğma meydanda “Bakı” ilə üz-üzə gələn komanda qarşılaşmadan 5:1 hesablı üstünlüklə ayrılıb. Məhəmməd Qurbanov dubl edib, digər qolları isə Orxan Əliyev, Tofiq Mikayılov və Budaq Nəsirov vurub. “Bakı”nın yeganə qolunu isə Nuran Qurbanov vurub.
Qeyd edək ki, “Sumqayıt” hazırlıq mərhələsi çərçivəsində növbəti yoxlama oyununu yanvarın 17-də “Kapital Bank Arena”da AZAL-a qarşı keçirəcək. Həmin qarşılaşma saat 16:00-da start götürəcək.
