Əvəzedici heyətləri arasında ölkə çempionatının “Simurq” – “İnter” oyununda dava düşüb.
Korner.az-ın məlumatına görə, aranın qarışmasına “İnter”in futbolçusu Coşqun Diniyev səbəb olub.
Belə ki, oyunun baş hakimi Rəşad Əhmədov matçın 84-cü dəqiqəsində meydan sahiblərinin qapısına penalti təyin edib. Penaltini dəqiq yerinə yetirən Diniyev daha sonra sonra tribunaya tərəf qaçaraq, azarkeşlərdən birinə əli ilə “sakit olmağı” tapşırıb. Bundan qəzəblənən zaqatalalı azarkeşlər isə meydana çıxaraq futbolçunu cəzalandırmaq istəyiblər. Nəticədə stadionda kütləvi dava baş verib. Referi Diniyevi qırmızı vərəqə ilə cəzalandırıb. Oyun 5-6 dəqiqə dayanıb. Klub rəhbərliyinin müdaxiləsindən sonra ara sakitləşib.
Yayılan məlumatlara görə, stadionun işçilərindən biri oyun ərzində Coşqun Diniyevi və valideynlərini ağır söyüşlərlə təhqir edib. Gənc futbolçu isə buna cavab olaraq qol vurandan sonra həmin adama “sus” işarəsi verib. Lakin azarkeşlər onun bu hərəkətini yanlış anlayaraq, dava salıblar. Nəticədə “İnter”in bir neçə oyunçusu xəsarət alıb.
Qeyd edək ki, Coşqun futbol üzrə Azərbaycan millisinin sabiq baş məşqçisi Şahin Diniyevin oğludu.
