“Oldhem” klubu Uels yığmasının keçmiş hücumçusu Çed Evansı heyətinə qatmağın bir addımlığında fikrindən dönüb.
Korner.az-ın məlumatına görə, ingilis mətbuatı bunun əsas səbəbini araşdırıb. Məlum olub ki, “Oldhem” klubunun rəhbərlərindən birinə hədə-qorxu gəliblər. Belə ki, ingilis mənbələrində yazılanlara görə, kimliyi bilinməyən şəxs klubun direktoruna Evansı transfer edəcəyi halda qızını zorlayacağını bildirib. Transferin, məhz bu səbəbdən baş tutmadığı iddia edilir.
Xatırladaq ki 2 il öncə Çed Evans zorlama hadisəsinə görə 5 il həbs cəzası almışdı. Cəzasını 2 il çəkəndən sonra azadlığa çıxan Evans futbolçu karyerasını davam etdirmək niyyətindədi.
“Şeffild” klubunun da transfer etmək istədiyi uelsli forvard hələ də özünə klub tapa bilməyib. 26 yaşlı futbolçunun özü isə 2 il əvvəl olanları hələ də inkar etməklə məşğuldu.(DailyMail)