Ötən gün əvəzedici heyətlərin ölkə birinciliyinin XXVII turunda "Simurq" "Şəfa" stadionunda "İnter"in qonağı olub. Qarşılaşma 0:0 hesabı ilə bitib.
Korner.az-ın məlumatına görə, səfərdən vacib bir xalla qayıdan "sarı-qaralar"ın baş məşqçisi Rövşən Babayev oyun haqqında fikirlərini klubun rəsmi saytına bildirib:
"Gözəl oyun keçdi. Hər iki komanda sona qədər mübarizə apardı. Həm “Simurq”, həm də “İnter” kollektiv oyun nümayiş etdirdi. Bügün komandam meydanda əsil əzmkarlıq göstərdi. Gecə saat 4-də yola çıxmaq və gəlib səfərdə güclü rəqiblə görüşdə belə vacib xal qazanmağımız əla nəticədi. Üstəlik də, dünən gecə Zaqatalada 4 bal gücündə zəlzələ olmuşdu. İlk “altılıq”da mübarizə aparan komandalar, xüsusəndə yüksək yerlər uğrunda yarışan komandalar üçün hər görüşdən xalla qayıtmaq çox vacibdi. Buna görə yetirmələrimə çox sağ ol deyirəm. Onlara halal olsun ki, bir gecə yatmadan gəlib bu cür çətin görüşdən vacib xal qazandılar".
O, rəqibi də dəyərləndirib: "Bugünkü rəqibimiz həqiqətən güclü heyətə malik komandadı. Gələcəyi parlaq olan kollektivdi. Ancaq yaddan çıxarmayaq ki, “Simurq”da hər bir rəqibinə öz sözünü deyə bilən komandadı".
Rövşən Babayev yetirmələrinin ilk hissədə "İnter"dən daha üstün oyun nümayiş etdirdiyini bildirsə də, sonradan meydana daxil olmuş futbolçularının sərgilədiyi oyundan razı qalmadığını da açıqlamasıda xüsusi vurğulayıb:
"Birinci hissədə rəqibdən çox üstün oyun nümayiş etdirdik. Fasilədən sonra isə deyərdim ki, bərabər səviyyəli qarşılaşma keçdi. Uşaqlar meydanda bütün tapşırıqlarımı maksimum səviyyədə yerinə yetirməyə çalışdılar.
İkinci hissədə dəyişiklər etməli oldum. Təbii ki, onların oyunu məni o qədərdə qanə etmədi. Bu gün onlardan istədiyimizi ala bilmədik. Ancaq o futbolçular kollektivdə hələ təzədilər. Onlara vaxt vermək lazımdır. İnanıram ki, gələcəkdə hər şey qaydasına düşəcək".
