Ukraynanın “Şaxtyor” klubunun baş direktoru Sergey Palkin Çempionlar Liqasının 1/8 final mərhələsi çərçivəsində “Bavariya”ya qarşı Almaniyada keçirdikləri oyundan danışıb.
Korner.az-ın məlumatına görə, o, Münhendə baş tutmuş matçda komandasından kiminsə qırmızı alacağını bilirmiş.
“Lvovdakı oyunda Alonsoya qırmızı vərəqə göstəriləndə dərhal dedim ki, Münhendə də bizim oyunçulardan biri meydandan qovulacaq. Ancaq hansı dəqiqədə “qırmızı” alacağımızı bilmirdim. Üçüncü dəqiqədə göstərilməsi gözlənilməz oldu. Almaniya UEFA-ya böyük həcmdə pul qazandırır. Belə bir “yağlı tikə”ni bu mərhələdə itirmək UEFA-ya sərf eləməzdi. Əminəm ki, Kuçerə üçüncü dəqiqədəki epizodda qırmızı vərəqə verilməsəydi, matçın gedişatında Duqlas ilə Kosta qovulacaqdı”, – deyə Palkin bildirib.
Xatırladaq ki, ilk oyunda qolsuz heç-heçə edən “Şaxtyor” Münhendə keçirilmiş matçda qapısından 7 cavabsız top buraxmışdı.
