İspaniyanın “Real Mursiya” klubunda çıxış edən Eddi İsrafilov Azərbaycan millisinə gəlmək üçün AFFA-dan 500 min avro istəyib və bizim federasiyanın mövqeyi belə olub: “Milli komandada hər hansı məbləğ qarşılığında oynamağın yolverilməz olduğunu bildirən AFFA Eddi İsrafilovun təklifini qəbul etməyib və qeyd edib ki, millinin şərəfini qorumaq hər bir idmancı üçün müqəddəs borc hesab olunmalıdır”.
Yığmanın bütün oyunlarından əvvəl futbolçulara böyük məbləğdə mükafat söz verən, bir neçə il əvvəl səfərdə Uelsə məğlubiyyətə görə (!) pul paylayan AFFA-nın “müqəddəs borc”dan danışması sadəcə, gülüş yaradır. İndi millidə oynayanlar “müqəddəs borclar”ını Fələstinə uduzmaqla ödəyirlər? Yoxsa Bakıda Lüksemburqla heç-heçə etməkdi “müqəddəs borc”? Siz bu futbolçuları bir gün pulsuz qoyun, millinin nəticələrindən asılı olaraq mükafat söz verməyin, ya da onlara pullu klublara keçmək üçün millidə oynamağın lazım olmadığını deyin, onda görüm “müqəddəs hisslər”i baş qaldıracaq, ya yox. Mən də futbolçu olsam, İspaniyada oynasam, Azərbaycan millisinə gəlmək üçün pul istərdim. Təzminat! Çünki Azərbaycan millisində oynamaq rüsvay olmaq, psixoloji travma almaq, karyeranda böyükhesablı məğlubiyyətlərin yazılması deməkdi. Vətənşüvənlik, milli təəssübkeşlik – bunları keçin. Bunlar keçilmiş və tapdalanmış yollardı. Elə həmin Elxan Məmmodov 6 ay pulsuz işləyərmi AFFA-nın baş katibi postunda? AFFA-dakılar bircə ay məvacib almasalar, dünyanı dağıdarlar.
Əcaba, Vladimir Levin, Aleksandr Çertoqanov, Usum Nduka və başqa legionerlər doğrudanmı millimizin formasını geyinməyi özlərinə müqəddəs borc bilirlər?)) Böyüklü-kiçikli minlərlə, yüzminlərlə turbaları olan Azərbaycan neftindən onların cibinə pullar axmasa, onlar üçün pul verən istənilən ölkə vətən olardı. Hətta Ermənistan da. Sənin “müqəddəs borc”una, AFFA…
Rəşad Ergün
