Premyer Liqanın startına az qalmış klublar hazırlıqlarını yekunlaşdırmağa başlayıblar.
Korner.az-ın məlumatına görə, Premyer Liqada çıxış edəcəyi dəqiqləşən “Turan” heyəti formalaşdırmağa davam edir.
Bu barədə klubun mətbuat xidmətinin rəhbəri Süleyman Tağıyev məlumat verib: “Komanda gündə iki dəfə, əsasən, səhər fiziki, axşam isə topla məşq edir. Ancaq yoxlama oyunları keçirməkdə problemlər yaşayırıq. İndiyə kimi yalnız “Göyəzən”lə yoxlama oyunu keçirsək də, başqa rəqib tapa bilmirik, vaxt da az qalıb. “Mətbuatda yoxlama oyunu üçün Bakıya yollanacağımızla bağlı məlumatlar yer alsa da, bu doğru deyil. Bizə yaxın olan “Şəmkir” və “Karvan”la da yoxlama oyunu keçirə bilmirik. Bunun səbəbi isə həmin komandaların hələ yığılmamasıdı.
Klub rəsmisi baxışda futbolçuların olduğunu bildirib: “Bütün bunlara baxmayaraq “Turan” hazırlıqlarını davam etdirir. Heyətdəki boşluqları doldurmaq üçün bir neçə futbolçu baxışdadır. Hazırda Murad Ağakişiyev, Elhad Əhmədov, Hüseyn İsgəndərov, Viktor Qonta, İvan Draqoviç, Antonio Rukovin, Bayram Kərimov məşqçilər korpusu tərəfindən dəyərləndirilir. Ancaq onlar haqqında hələ yekun qərar verilməyib. Lazım bilinən futbolçularla yaxın günlərdə müqavilə bağlanacaq. Komandanın çox gec yığılmasına, futbolçu tapmaqda çətinliklərlə qarşılaşmağımıza baxmayaraq, inanıram ki, yeni mövsümdə fərqli “Turan” görəcəyik. Ən azı hər şey ötən mövsümdəkindən yaxşı olmalıdı”.
pfl.az
