“Xəzər Lənkəran” klubunun müdafiəçisi Ruslan Abışov Avropa Liqasının II təsnifat mərhələsi çərçivəsində Poznanda “Lex”ə 0:1 hesablı məğlubiyyətdən sonra müsahibə verib.
– “Lex”ə uduzduğunuz matçı necə şərh edərdiz?
– Oyuna çox yaxşı hazırlaşmışdıq. Çünki evdə əldə etdiyimiz 1:1 hesablı bərabərlik bir o qədər yaxşı nəticə olmasa da, Poznana qələbə ardınca gəlmişdik. Mənə elə gəlir ki, yaxşı oynayırdıq. Sadəcə, buraxdığımız qol çıxışımıza bir qədər təsir etdi. Bundan sonra yenə də fərqlənib, hesabı bərabərləşdirməyə çalışdıq. Lakin qol olmadı. Deyərdim ki, haradasa bəxtimiz də gətirmədi və özümüzə bir az inamsızlıq da var idi.
– Bəxtiniz nədə gətirmədi?
– Hücumda çox tələsirdik, bir az sakit oynasaydıq, “Lex” keçiləsi rəqib idi. Amma alınmadı, artıq hər şey keçmişdə qalıb və çempionata hazırlaşacağıq.
– Öz çıxışınız barədə nə deyə bilərsiz? Nədənsə, son 2 matçda oyununuz istənilən səviyyədə alınmadı…
– Əlbəttə, “Lex”lə qarşılaşmalara baxdıqda deməzdim ki, o qədər də yaxşı oynadım. Bəzi epizodlar vardı ki, onu normal dəyərləndirsəydik, hamının çıxışı yaxşı alınardı.
– Hakim idarəçiliyindən razı qaldınız?
– Artıq hər şey əldən gedib. Həmişə görürük ki, Avropada da, evdə də oynayanda hakimlərin bizə antipatiyası var. Yəqin ki, bizi sevmirlər. Bu da həm milli, həm də klub reytinqimizin çox aşağı olmasından irəli gəlir.
– Sizə elə gəlmir ki, favorit göstərilməsinə baxmayaraq, “Lex” heç də əvvəlki kimi güclü deyildi…
– Düzdür, “Lex”i çox şişirtmişdilər. Amma biz də bilirdik ki, bu komanda əvvəlki səviyyəsində deyil. Oyunlar da bunu sübut etdi. Deyərdim ki, eyni səviyyəli komandalar idik. Düzdür, onların Avropada ustalıq səviyyələri bilinirdi, hər bir şəraitindən, hər bir baxımdan Avropa komandası olması hiss edilirdi. Sadəcə, 90 dəqiqə onlar daha intizamlı oynayırdılar. Arada o qədər də fərqləndirməyə nəsə yox idi.
– Baş məşqçi Yunis Hüseynov oyundan öncə ən çox azarkeşlərdən ehtiyatlandığını söyləmişdi. Yerli fanatların sizə təsiri oldumu?
– Özünüz də gördünüz ki, fanatlar çox möhtəşəm idi. Amma onların bizə hansısa təsiri olmadı. Çünki buna öyrənmişik və milli ilə oynayanda da belə atmosfer yaranır. Bunun üçün heç bir problem yox idi. Biz sadəcə, bəzi epizodlarda tələskənliyə yol verdik. Bu da oyuna mənfi təsirini göstərdi.
– “Xəzər Lənkəran”dan fərqli, sabiq komandanız “Neftçi” avrokuboklarda çıxışını davam etdirir. “Neftçi” Çempionlar Liqasının və ya Avroliqanın qrup mərhələsinə düşsə, Lənkəran təmsilçisini seçməyinizə təəssüflənməyəcəksiz?
– Xeyr. “Neftçi”yə uğurlar arzulayıram. Artıq hər şey keçmişdə qalıb və gələcəyə baxmaq lazımdır. Demək xeyirlisi, qismət belə imiş. Başımı aşağı salıb, məşqimi edib, öz oyunumu oynayacağam
apasport.az
