"İnter"in müdafiəçisi Ruslan Əmircanovun Korner.az saytına müsahibəsi:
-Dünənki qələbə barəsində nə deyə bilərsiz?
-Qələbəyə inamımız tam idi. Ancaq bu cür böyükhesablı qələbə gözləmirdik. Oyundan əvvəl yatsaq yuxumuza da girməzdi ki, 4:1 hesablı qələbə qazanarıq. Oyunun daha çətin keçəcəyini düşünürdük. "Qəbələ" həmin komandadır ki, iddialı "Qarabağ"ı kubokdan uzaqlaşdırıb. Erkən qol vurmağımız da bizə çox böyük xeyir verdi. Mənim də qol vurmaq şanslarım var idi, təəssüf ki, yararlana bilmədim. Amma təbii ki, əsas komandamızın qələbəsi idi.
-Hesabın belə olmasını nəyə bağlayırsan? Sizcə, bu sizin güclü oyununuzdan irəli gəldi, yoxsa rəqib gözləniləndən zəif oynadı?
-Biz komanda olaraq çox yaxşı idik. Bundan əvvəlki oyunlarda əlimizə düşən fürsətləri dəyərləndirə bilmirdik. "Neftçi" ilə kubok oyununlarının hər ikisində biz üstün oynadıq, biz daha çox qol epizodu yaratdıq, ancaq bir topa görə kubokdan kənarda qaldıq. "Qəbələ" ilə matçda isə yaratdığımız epizodlardan maksimum yararlandıq.
-Avrokuboklara gedə bilmək üçün "İnter"in şanslarını necə qiymətləndirirsən?
-Bu bizim öz əlimizdədi. Məşqçimizin verdiyi tapşırıqları layiqincə yerinə yetirsək, məncə, biz avrokuboklara vəsiqə qazanacağıq. Bunun üçün əlimizdən gələni edəcəyik. Çempionatda zəif komanda yoxdu. Hər bir komanda istənilən komandanı məğlub edə biləcək gücdədi. Bu gün autsayder kimi göstərililən "Sumqayıt" və "Rəvan" kimi komandalar da güclü rəqiblərini məğlub edə, xal ala bilirlər.
-Bəs öz gələcək karyeran barəsində nə deyə bilərsən? Şəxsi hədəflərin nədi?
-Son toplanışda milliyə dəvət aldım. Davamlı olaraq milliyə çağırılmaq istəyirəm. Hər bir futbolçu üçün olduğu kimi, mənim üçün də, millidə oynamaq fəxrdi. Təbii ki, xaricdə legioner həyatı da yaşamaq istəyərəm. Kim istəməz ki, Türkiyə, Rusiya və ya başqa Avropa ölkələrində futbol oynamaq? Yaşım 29 olsa da, özümü yaxşı hiss edirəm. Hələ də mübarizə aparacaq gücüm var.
