“2020-ci il Avropa çempionatını keçirmək hələlik biz tərəfdən istəkdir. Kim bu turniri keçirmək istəyini bildiribsə, UEFA həmin ölkəyə mayın 30-da tender sənədlərini verəcək. Həmin namizəd ölkələrə 18 ay vaxt verilir ki, hazırlıq prosesi getsin. Təkliflər nəzərdən keçiriləndən sonra 2013-cü il sonunda – 2014-cü ilin əvvəlində artıq yekun qərar veriləcək”. Korner.az-ın məlumatına görə, bu fikirləri AFFA prezidenti Rövnəq Abdullayev deyib.
AFFA FİFA-nın Budapeştdə keçirilən Konqresində 2020-ci il Avropa çempionatının final mərhələsini Gürcüstanla birgə keçirmək üçün namizədliyini irəli sürüb.
Abdullayev bu mötəbər turnirə keçirməyə hazır olduqlarını bildirib: “Mən Avro-2020-yə hazırlıq mərhələsində problem görmürəm. Bildiyiniz kimi, 65 minlik tutumlu Olimpiya stadionumuz tikilir. Bu, çox yüksək səviyyəlidir və deyərdim ki, regionda ən böyük stadionlardan biridir. Tofiq Bəhramov adına Respublika stadionunun rekonstruksiya olunmağı haqda məlumatınız var və sentyabrda 17 yaşadək qızlar arasında dünya çempionatının açılışı orada olacaq. Bilirsiniz ki, UEFA-nın qərarı ilə 17 yaşadək oğlanlar arasında Avropa çempionatının final mərhələsi Azərbaycanda keçiriləcək. Yəni Avro-2020-yə qədər bura bir neçə mötəbər turnirlər keçiriləcək və artıq bu məsələdə təcrübəni toplayırıq.
Çempionatı keçirməyə 2 ölkə tərəfindən namizədliyin verilməyi şansları artırır. Bunu hazırlıq mərhələsi göstərəcək. Əgər Avropa çempionatını 2 ölkə birgə keçirmək istəyini bildirirsə, bu, hərəsinə 8 stadion deməkdir. Bu da bizim üçün problemsizdir. Artıq 2 böyük stadionumuz var. 2 böyük stadionu da Bakıda tikmək bizə belə problem olmaz”.
