Dünən Tofiq Bəhramov adına Respublika stadionunun media sektorunun giriş hissəsində çökmələrin olması haqda xəbər vermişdik. Məsələyə ictimai-siyasi mediada da diqqət ayrılıb.
Korner.az qafqazinfo.az-a istinadən xəbər verir ki, stadionun direktoru Akif İsmayılov çökmə ilə bağlı məsuliyyət daşımadığını bildirib: “Stadionu mən təmir etməmişəm ki?! Bununla tikinti idarəsi məşğul olub”.
Direktor həmin tikinti idarəsinin adından da xəbərsiz olduğunu qeyd edib.
“Stadionun direktoru kimi tikintinin necə getdiyi, ayrılan pulların necə istifadə edildiyi ilə heç maraqlanmamısınız?” sualına isə Akif İsmayılov “yox” deyə cavab verib: “Tikinti işinə mən nəzarət etmirəm. Buna komissiya nəzarət edir”.
Qeyd edək ki, arena qızlar arasında dünya çempionatı ərəfəsində – bu ilin avqust ayının 16-da Prezidentin iştirakı ilə yenidən istifadəyə verilmişdi.
Qeyd edək ki, “Qafqazinfo” saytı hələ stadionda təmir gedən zaman – mayın 17-də sözügedən məkandan fotosessiya hazırlamış və stadionun təmiri ilə məşğul olan Koreya Respublikasının “Samhoa” şirkətini elə Akif İsmayılov özü saytın əməkdaşına təqdim etmişdi. Həmin xəbəri aşağıdakı linkdən oxuya bilərsiniz.
Akif İsmayılovun stadionu təmir edən Koreyanın “Samhoa” şirkəti ilə bağlı informasiyası
