“Neftçi”nin futbolçusu Erik Ramos klubun rəsmi saytına açıqlama verib.
Korner.az-ın məlumatına görə, paraqvaylı futbolçu ölkə kubokunun 1/4 final mərhələsinin cavab oyunu çərçivəsində AZAL-a qarşı baş tutan oyunda hakimi söyməsi ilə bağlı söz-söhbətləri təkzib edib.
“Kubok matçına qədər AZAL klubu ilə çempionat oyunlarında da bir neçə dəfə qarşılaşmışdıq. Son görüş də kifayət qədər gərgin və maraqlı alındı. Bu futboldu və tərəflərdən biri qələbə qazanmalıdır. Tərlan Əhmədov AZAL klubundan əvvəl “Neftçi”də köməkçi məşqçi və baş məşqçi əvəzi işləyib. Hələ o vaxtdan bilirdik ki, Tərlan Əhmədov ispan dilində başa düşmür. Əgər oyunda işlətdiyim hər hansı ifadəni Tərlan Əhmədov söyüş kimi başa düşübsə, bu mənim günahım deyil. AZAL klubu ilə oyunda qayda pozuntusuna yol verdim və hakim də mənə sarı vərəqə göstərdi. Orada heç bir təhqiramiz söz işlətməmişəm. Sadəcə bu cür açıqlamalar verməklə ictimaiyyətdə mənfi rəy formalaşdırmaq cəhdi yanlışdır”, – deyə yarımmüdafiəçi bildirib.
