Peşəkar Futbol Liqasının (PFL) prezidenti Ramin Musayevin Korner.az saytına müsahibəsi
– Ramin müəllim, "Neftçi" tərəfi çempionatın təqvimindən, daha doğrusu,ı Avropa Liqası oyunları ilə əlaqədar onlara güzəşt edilməməsindən narazıdı. Bununla bağlı sizin münasibətinizi bilmək istəyərdim.
Ümumiyyətlə, biz "Neftçi"yə görə deyil, Azərbaycan futbolu naminə oyunların bəzilərini təxirə saldıq. Bu sırf ölkə futbolunun inkişafı naminə atılmış addımdı. "Neftçi"nin məşqçiləri narazıdı təqvimdən. Bu da normaldı. Məşqçi uğur qazananda yaxşıdı, amma məğlubiyyətlə də barışmalıdı.
– Belə çıxır ki, "Neftçi"nin məşqçilər korpusu uğursuzluqarı PFL-in üstünə atır?
Məşqçi məğlubiyyəti həzm edə bilmədikdə, günahı başqalarında axtarır. Misal üçün, götürək Rusiya çempionatını. "Neftçi"nin rəqibi olan "Rubin" avrokubok oyunundan öncə ÇSKA ilə qarşılaşdı. "Neftçi" ilə oyundan 2 gün sonra isə "Anji"ni öz meydanında məğlub etdi. Hər kəs məğlubiyyəti həzm edə bilməlidi. Yoxsa kimdəsə günah axtarmaq düz deyil.
– "Neftçi" gələn həftə "Rubin"lə doğma meydanda oynayır. Bu oyunda "Neftçi"dən nə gözləmək olar?
Yalnız qələbə. Mən inanıram ki, "Neftçi" "Rubin"i Bakıda məğlub edib, azarkeşlərimizi sevindirəcək.
– "Neftçi"nin prinsipial rəqibi "Xəzər Lənkəran" yenə başsız qaldı. Yunis Hüseynov istefaya göndərildi. Bununla bağlı siz nə deyərdiz?
Bu klubun daxili işləridi. Mənim bu haqda nəsə danışmağım düz çıxmaz. Klubun vitse-prezidenti Tuyqun Nadirovun bu məsələni tezliklə həll edəcəyinə inanıram.
– Sonda yayım bir məsələyə aydınlıq gətirməyinizi istərdim. Son turda əyalətdə baş tutan oyunların heç biri canlı yayımlanmadı. Bu turda da planlaşdırılmır. Bunu necə izah etmək olar?
Kim dedi ki, göstərilməyəcək? Lənkəranda keçiriləcək "Xəzər Lənkəran" – "Rəvan" oyunu canlı yayımlanacaq. Bundan başqa, "İdman Azərbaycan" kanalı Tovuzda keçiriləcək "Turan" – "Simurq" oyununu da canlı yayımlamaq istəyir. Biz çalışırıq ki, bölgələrdə keçirilən oyunlar da canlı yayımla azarkeşlərə göstərilsin.
Səxavət QURBANOV
