“Keçən il də mübarizəyə Çempionlar Liqasından başlamışdıq və avrokuboklarda uğurlu il keçirdik. Amma bu il istər-istəməz məndən və komandadan daha çox şey tələb edirsiniz. Çalışdıq ki, komandanı normal səviyyəyə gətirək. Tam istədiyimiz kimi alınmadı. Amma pis hazırlaşmamışıq”.
Korner.az-ın məlumatına görə, bu sözləri “Qarabağ”ın baş məşqçisi Qurban Qurbanov Monteneqro “Rudar”ı ilə Çempionlar Liqasının II təsnifat mərhələsinin ilk oyunu öncəsi mətbuat konfransında deyib.
43 yaşlı mütəxəssis komandasının Çempionlar Liqasına normal hazırlıq keçdiyini deyib: “Oyunlarına baxsaq da, “Rudar”ı tam istədiyimiz səviyyədə tanımadıq. Heyətlərində müəyyən dəyişikliklər var, 5 yeni oyunçu alıblar. Topla davranmağı xoşladıqlarını və standart vəziyyətlərdən yararlandıqlarını sabah görəcəksiniz. Topla yaxşı davranmaları bizə problem yarada bilər. Rəqibi nə qədər analiz etsək də, onu ilk oyundan sonra tanıyırıq. Ona görə də ilk oyun daha çətin olacaq”.
Baş məşqçi start heyətini müəyyənləşdirdiklərini də açıqlayıb: “Çalışmışam ki, oyun tərzini dəyişməyim, əksinə, daha da yaxşılaşdırım. Futbolçular da hansı sistemdə oynamalı olduqlarını bilirlər. Nə qədər axtarsaq da, azad transfer tapa bilmədik. Əsas odur ki, düşündüyümüz kimi futbolçu olsun. Təcrübəmiz daha çoxdur. Bu bizə kömək edə bilər. Bəzi futbolçularımızla yollarımızı ayırdıq. Əvəzində gənc oyunçular və yeni legionerlər götürdük. Nə qədər uğur qazansaq da, yaxşı transferə ehtiyac olur”.
Qeyd edək ki, iyulun 15-də Tofiq Bəhramov adına Respublika Stadionunda keçiriləcək “Qarabağ” – “Rudar” matçı Bakı vaxtı ilə saat 21:30-də başlanacaq.
