“Komandanın oyunundan razı qaldım. Bu gün komanda şəklində döyüşdük”.
Korner.az-ın “futbolxeber.az”a istinadən verdiyi məlumata görə, bu sözləri “Qəbələ”nin baş məşqçisi Roman Qriqorçuk Topaz Premyer Liqasının 20-ci turunda “İnter”ə qalib gəldikləri oyundan (1:0) sonra deyib.
Ukraynalı mütəxəssis komandasının qələbəsini şərh edib: “Uzun müddətdir ki, qələbə qazana bilimirdik. Amma elə oyunlar olub ki, yaxşı oynasaq da, məğlub olmuşuq. Oyunda əvəzetmə etmədim. Çünki buna ehtiyac görmədim. Ötən tur iki hücumçumuzu itirdik. Bu, elə də ürəkaçan deyil. Hakimlik barədə danışmaq istəmirəm. Düşünürəm ki, rəqibə və bizə göstərilən sarı vərəqə arasında fərqlilik vardı. Bu mənim şəxs fikrimdir. Rəşad Sadiqov cərimə edən kimi birbaşa sarı vərəqə aldı. Elə bil hakim “sarı”nı əlində saxlamışdı. Digər tərəfdən Santosda da müəyyən kobudluq vardı. Baxışda olan Emerton komandada qalmayacaq”.
Roman Qriqorçuk Sergey Zenyovla Aleksey Antonovun vəziyyətinə də aydınlıq gətirib: “Zenyovda güclü beyin silkələnməsi olub. Hazırda realibitasiya prosesi keçir. Yaxın zamanlarda məşqlərə qoşulacaq. Antonov isə 4-5 həftə oynamayacaq”.
