Qarabağ”ın yeni transferi – Mərakeş əsilli fransalı yarımmüdafiəçi Alharbi El Jadeyaouinin müsahibəsi:
– Artıq 1 aya yaxındı ki, “Qarabağ”a qoşulmusan. Kklub haqqında ilkin təəssüratların necədi?
– “Qarabağ”a gəldiyimə görə çox xoşbəxtəm. Böyük bir kluba gəldiyimi bilirəm. Çox gözəl kollektivimiz var. Burada qalmağı çox istəyirəm.
– Ümumiyyətlə, buraya gəlməmişdən əvvəl Azərbaycan futbolu və “Qarabağ” haqqında nə bilirdin?
– Bundan əvvəl çıxış etdiyim “Lans” klubunun rəhbəri azərbaycanlı iş adamı Hafiz Məmmədov idi. Ona görə də müəyyən qədər məlumatım var idi, Bakının da şəkillərini görmüşdüm. Bundan başqa, “Qarabağ”ın Avropa Liqasında “Sent-Etiyen”lə matçlarında səviyyəli bir komanda olduğunu da görmüşdüm. “Qarabağ”ın məni transfer etmək istədiyini eşidəndə açığı bir az təəccübləndim.
– Necə düşünürsən, bu il “Qarabağ” avrokuboklarda hansı nəticə qazana bilər?
– Hələ ki, “Qarabağ”ın heyətində matça çıxmamışam deyə dəqiq bir şey söyləyə bilmərəm. Amma düşünürəm ki, yüksək nəticə qazanacağıq. Ümumiyyətlə, Avropanın böyük klublarında olduğu kimi gözəl bir bazaya sahibik. Gələcəyi parlaq olan futbol ölkəsisiniz. Bir az da çalışmaqla daha da yaxşı nəticələr qazana bilərsiniz.
– Fransada adətən, dolu tribunalar qarşısında çıxış etmisən. Ancaq Azərbaycan çempionatında oyunlara adətən, 500-1000 arası azarkeş gəlir. Bu hal səni narahat etmir? ( red: Bu sualdan sonra bizə tərcüməçi olaraq kömək edən və yenicə bu işə təyin olunmuş klubun türkiyəli fizioterapevti Osman Aydoğdu dodağını dişləyərək heyrətini gizlədə bilmir. Görünür, Osman bəy Azərbaycan çempionatına azarkeş marağının yüksək olmamasını bilmirmiş.)
– Təbii ki, bu vəziyyətdə çıxış etmək heç də asan deyil. Tribunaları doldurmaq mənim məqsədim və ümidimdi. Klubu təmsil edən bir futbolçu kimi azarkeşləri stadionlara cəlb etməliyik. İnşallah, yaşada biləcəyimiz sevinclərlə insanların bura axınını gücləndirməyə çalışacağıq. Futbolçu kimi gözəl stadionlarda çıxış etmək yaxşıdı lakin, azarkeşsiz bu çətindi.
– Bütün karyeran boyu Fransa çempionatında çıxış etmisən və ilk dəfədi ki, legioner həyatı yaşayırsan. Maraqlıdı, səni Azərbaycanda əsas cəlb edən nə oldu ki, “Qarabağ”da oynamağa razılıq verdin?
– 20-21 yaşlarımda xaricdən bir çox təkliflər almışdım. Ailəmlə məsləhətləşdikdən sonra çox gənc olduğumu düşünüb, kənara çıxmamağa qərar verdim. Fransada oynayıb, təcrübə qazanmağa üstünlük verdim. İndi 28 yaşım var. Legioner həyatı yaşamağın vaxtı olduğunu düşünürdüm və Azərbaycandan təklif gəldi. Fikirləşdim ki, niyə də olmasın? Hamı legioner həyatı yaşamaq istəyir. Karyerama Fransada son qoysaydım legioner təcrübəm olmayacaqdı. Ona görə də Azərbaycanda çıxış etməyə üstünlük verdim.
futbolinfo.az
