Korner.az sizi Azərbaycan çempionu "Qarabağ"ın Avropa Liqasının qrup mərhələsindəki rəqibləri ilə tanış edir.
İnter (Milan, İtaliya)
Tam adı: F.C. Internazionale Milano S.p.A.
Yaranma ili: 1908
Stadionu: "Cüzeppe Meatsa" (San-Siro), 80 018 azarkeş tutumlu
Prezidenti: Erik Tohir
Baş məşqçisi: Valter Matsari
Klub 18 dəfə İtaliya çempionu olub, 7 dəfə ölkə kubokunu qazanıb, 5 dəfə İtaliya Super Kubokuna sahib çıxıb, 2 dəfə qitələrarası kuboku əldə edib, 3 dəfə Çempionlar Liqasının baş mükafatına sahib çıxıb, 3 dəfə də UEFA Kubokunda (indiki Avroliqa) qızıl medalları qazanıb.
"İnter"in xüsusi təqdimata ehtiyacı yoxdu. İtaliyanın ən nəhəng klublarından biri olan Milan təmsilçisi son illər uğursuz çıxış edir. Son mövsümdə bu komanda A Seriyasını 6-cı yerdə başa vurub. Məhz bunun sayəsində Avropa Liqasına vəsiqə qazanan "İnter" bu turnirin pley-off mərhələsində İslandiya "Styarnan"ına iki oyunun nəticəsinə görə 9 cavabsız qol vurub (səfərdə 3:0, evdə 6:0).
"İnter" Azərbaycanlı futbolsevərlərə də yaxşı tanışdı. İki il öncə bu komanda Avroliqanın qrup mərhələsində "Neftçi" ilə eyni qrupda yer almışdı və Bakıda 3:1 hesablı qələbədən sonra Milanda 2:2 hesablı heç-heçəyə razılaşmışdı.
Dnepr (Ukrayna)
Tam adı: Футбольний клуб Днiпро
Yaranma ili: 1918
Stadionu: "Dnepr Arena". 31 003 tamaşaçı tutur
Prezidenti: İqor Kolomoyski
Baş məşqçisi: Miron Markeviç
"Dnepr" 2 dəfə SSRİ çempionu olub, 1 dəfə SSRİ Kubokuna, 1 dəfə SSRİ Super Kubokuna sahib çıxıb. Ukrayna çempionatında iki dəfə gümüş mükafatçı olub, 3 dəfə Ukrayna Kubokunda final oynayıb, 1 dəfə isə İntertoto Kubokunun finalına yüksəlib.
"Dnepr" artıq neçə illərdi ki, Ukrayna nəhəngləri "Şaxtyor", "Dinamo" və "Metallist"ə rəqabət yaratmağa çalışan əsas rəqiblərdəndi. Komanda son mövsümdə ikinci olub. Klubun büdcəsi 90 000 000 dollara yaxındı.
Avropa Liqasının pley-off mərhələsində bu komanda Xorvatiya "Hayduk"unu çətinliklə keçib (evdə 2:1, səfərdə 0:0).
Sent-Etyen (Fransa)
Tam adı: Association Sportive de Saint-Étienne Loire
Yaranma ili: 1919
Stadion: "Jofrua Qişar", 35 616 tamaşaçı tutumlu
Prezidenti: Bernar Kayaçço
Baş məşqçisi: Kristof Qalte
Bu komanda 10 dəfə Fransa çempionu olub, 6 dəfə ölkə kubokunu qazanıb. 5 dəfə Fransa Super Kubokuna sahib çıxan klub Çempionlar Kubokunun da finalçısı olub.
"Sent-Etyen" ötən mövsüm son 32 ildə ilk tituluna sahib çıxdı. Bu komanda Fransa Kubokunu qazanmaqla uzun illərdi davam edən uğursuz gedişata son qoydu. Komanda son mövsümdə Liqa 1-də də dördüncü olmuşdu. Avroliqanın pley-off mərhələsində bu komanda Türkiyənin "Karabükspor" klubuna penaltilər sayəsində qalib gəlib (səfərdə 0:1, evdə 1:0, penaltilər – 4:3).(azerisport)
