2015-2016 mövsümünə hazırlığı Ərzurumda davam etdirən “Qəbələ” təlim-məşq toplanışının I hissəsinin 5 gününü arxada qoyub.
Korner.az-ın məlumatına görə, mövsümlərarası fasilədə “qırmızı-qaralar”a qoşulan Andrey Popoviç Türkiyə toplanışı ilə bağlı fikirlərini gabalafc.az saytına açıqlayıb:
“Hazırlığımızı gündə iki dəfə məşq keçməklə davam etdiririk. Qısa yay fasiləsindən sonra yeni komandanın düşərgəsinə qoşulmuşam. İstirahətdən sonra məşqlərə başlamaq bir az ağır olur. Amma vaxt keçdikcə, uyğunlaşırsan. Çox şadam ki, “Qəbələ” kimi hədəfləri böyük olan komandaya cəlb olunmuşam. “Qəbələ” mənim üçün yeni komanda olsa da, bu klubda çıxış edən futbolçuların əksəriyyətini çoxdan tanıyırdım. Üstəlik, komandada ukraynalı məşqçilər və futbolçular da var. Bütün bunlar komandaya qısa zamanda uyğunlaşmağıma kömək etdi”.
Popoviç daha iki qapıçısı olan komandadakı rəqabətin faydasından və qolkiperlərlə çalışan məşqçi Andrey Qluşenko haqda fikirlərini bölüşüb: “Qəbələ”nin qapıçılarla çalışan məşqçisi Andrey Qluşenkonun hazırlıq proqramı ilə tanış oldum. İndiyədək belə məşq proqramı görməmişdim. Belə hazırlıq prosesinə uyğunlaşmaqda Qluşenkonun özü də kömək etdi. O, mənə dəstək olur. Mən “Qəbələ”yə keçəndə bilirdim ki, bu komandada Dmitri Bezotosnı, Anar Nəzirov kimi qapıçılar var. Bu üzdən də rəqabətin olacağını bilirdim. Kim güclüdürsə, o da şans qazanacaq. Lakın bura yeni gəldiyimdən qısa müddətdə rəqabətdən danışmaq tezdir. Ümumilikdə rəqabət futbolçuların yalnız xeyrinə olur. Bu, müsbət məqamdır”.
Azərbaycan millisinin oyun və təlim-məşq toplanışlarında iştirak edən Popoviç Serbiya və Norveçlə keçirilən matçlara dəvət almayıb. Bunun səbəbini açıqlayan qapıçı yenidən yığmaya qayıtmaq üçün əlindən gələni edəcəyini bildirib: “Mövsümün sonunda klubun heyətində oynamadığım üçün Azərbaycan millisinin Serbiya və Norveçlə oyunlarına dəvət almadım. Amma baş məşqçi Robert Prosineçki əvvəl məni heyətə daxil etmişdi. O, elə məşqçidir ki, klubunda çıxış etməyən futbolçunu milliyə cəlb etmir. Hətta yığmanın əsas heyət üzvləri də ilk növbədə klubunda oyun praktikası qazanmalıdı. Mənim də hədəfim “Qəbələ”də əsas heyət qapıçısı kimi möhkəmlənib, yenidən yığmaya qayıtmaqdı”.
