Fevralın 7-dən etibarən Türkiyənin Antalya şəhərində hazırlıqlarını davam etdirən “Qəbələ”nin 15 yaşa qədər futbolçulardan ibarət komandası təlim-məşq prosesi çərçivəsində ilk yoxlama oyununu keçirib.
Korner.az-ın klubun rəsmi saytına istinadən verdiyi məlumata görə, “qırmızı-qaralar” birinci matçda İsveçrənin “Dietikon” (U-16) kollektivi ilə qarşılaşıb.
Görüşün gedişində 1:3 hesabilə geriyə düşən “Qəbələ” yekunda matçı heç-heçə ilə bitirməyi bacarıb – 4:4. “Qırmızı-qaralar”ın heyətində İlkin Abdullayev, Fərid Nəbiyev və Allahverdi Əsədov (2) fərqlənib.
“Qəbələ” növbəti sınaq oyununda fevralın 14-də Danimarkanın “Kopenhagen” klubu ilə üz-üzə gələcək. Toplanış çərçivəsində son matç fevralın 17-də baş tutacaq. “Qəbələ” Şotlandiyanın U-15 millisi ilə münasibətlərinə aydınlıq gətirəcək.
Xatırladaq ki, U-15 komandasının Antalya toplanışı AFFA-nın dəstəyi ilə təşkil olunub. Buna səbəb “Qəbələ”nin ötən il sözügedən yaş qrupunda çempion olmasıdır.
