AFFA-nın baş katibi Elxan Məmmədov İngiltərənin paytaxtı Londonda UEFA-nın XXXVII Növbəti Konqresində iştirak edir.
Korner.az-ın məlumatına görə, Məmmədov səfər çərçivəsində UEFA-nın baş katibi Canni İnfantino və UEFA-nın Milli Assosiasiyalar üzrə direktoru Teodor Teodorislə görüşüb.
Baş katib AFFA-nın prezidenti Rövnəq Abdullayevin göstərişinə əsasən UEFA rəhbərliyinə Azərbaycan prezidenti İlham Əliyevin 2020-ci ildə təşkil olunacaq futbol üzrə Avropa çempionatının oyunlarının keçirilməsi üçün Bakı şəhərinin namizədliyinin irəli sürülməsi ilə bağlı sərəncam imzaladığını və AFFA-ya hazırlıq işlərinə başlamaq səlahiyyəti verildiyi barədə məlumat verib. Qeyd olunub ki, bu sərəncamla Azərbaycan prezidenti həmin turnirin paytaxtımızda keçirilməsinə dövlət səviyyəsində dəstək veriləcəyini bildirib.
UEFA rəsmilərinin diqqətinə çatdırılıb ki, AFFA yaxın gələcəkdə tələb olunan bütün sənədlərin hazırlığına başlayacaq. Dövlət başçısının sərəncamı hazırlıq prosesinə başlamaq imkanı verir və Azərbaycan bu məsələdə dövlət səviyyəsində dəstəklənən ilk ölkələrdən biridir.
