Avropa Liqasının II təsnifat mərhələsi çərçivəsində “Qarabağ”a 1:2 hesabıyla uduzan Polşa “Pyast”ının futbolçuları klublarının saytına matçla bağlı fikirlərini bildiriblər.
Korner.az rəqib oyunçuların açıqlamalarını təqdim edir.
Marsin Robak: “Avrokuboklardakı ilk qolumuzu vurduğum üçün xoşbəxtəm. Ancaq təəssüf ki, heç olmasa, heç-heçəni qoruya bilmədik. Bu oyun bərabərə bitsəydi, cavab matçında işimiz daha asan olardı. Çalışacağıq ki, Bakıda itirdiyimizi Qlivitsedə bərpa edək. Oyunun ikinci hissəsində “Qarabağ” bizə göz açmağa imkan vermədi. Onlar bizə göstərdilər ki, hücuma keçəndə nə cür oynamaq lazımdı”.
Damien Zbozyen: “Oyun çox ağır keçdi. Ancaq ümid edirəm ki, cavab oyununda daha yaxşı nəticə qazanacağıq. Bu işin öhdəsindən gəlmək heç də asan olmayacaq. Rəqib bizə göstərdi ki, futbol oynamağı bacarır. İtirəcək heç nəyimiz qalmayıb. Cavab oyununda rəqibə topla bu qədər sərbəst oynamağa imkan verməməliyik”.