Sabah “Bakı” Azərbaycan Topaz premyer-liqasının 31-ci turu çərçivəsində evdə “İnter”i qəbul edəcək. Bu gün oyunöncəsi son məşqini keçən komandanın baş məşqçisi Milinko Pantiç görüş haqda fikirlərini açıqlayıb.
Korner.az-ın klubun rəsmi saytına istinadən verdiyi məlumata görə, serb mütəxəssis bu fikirləri səsləndirib:
“Çox maraqlı və çətin oyun olacaq. İkinci yerlə dördüncü yerin qarşılaşması başqa cür ola da bilməz. “İnter”lə aramızda 5 xallıq fərq var. “Bakı” üçün final görüşüdü. Final oyunları isə oynanılmır, qələbə qazanılır. “İnter”in baş məşqçisi Kaxaber Tsxadadzenin işini də yüksək qiymətləndirmək lazımdı. O uzun müddətdi bir komandada çalışmaqla əsl oyun fəlsəfəsini ortaya qoyub. Cari mövsüm bu iki rəqibin görüşlərində heç-heçə tendensiya halını alıb. İnşallah, sabah qələbə qazanıb bu hala son qoymalıyıq. Əlbəttə, bizim əvvəlki görüşlərdə kifayət qədər fərqlənmək şanslarımız olsa da, çox qol vura bilməmişik. “İnter” bütün komandalar üçün çətin rəqibdi. Məni üzən məqam sabah Rauf Əliyevin meydana çıxa bilməməsiylə bağlıdı.
“İnter”lə 1:1 başa çatan əvvəlki oyunda da Raufun xidmətindən məhrum olduq. Ancaq bu, o demək deyil ki, mən mübarizə aparmaqdan qorxub, ağlayıram. Mövsümboyu “Bakı” və “İnter” turnir cədvəlində yanaşı pillələrdə olub. Finişə doğru “İnter”in 2-ci pilləyə qalxması məni bir o qədər narahat etmir. Komandam bu yerə gəlib çatıbsa, deməli, əziyyətləri böyükdü. Məni “Bakı”nın tutduğu mövqe yox, başqa məqamlar daha çox düşündürür. Sabah layiqli oyunla “İnter”ə daha da yaxınlaşmağa çalışacağıq”.
