"Oyun istədiyimiz kimi alınmadı. Oyunçular sanki ağır davranırdılar. Ümumilikdə isə oyundan razı qaldım". Korner.az-ın məlumatına görə, bu sözləri "Bakı" klubunun baş məşqçisi Növruz Əzimov Avropa Liqasının birinci təsnifat mərhələsində Sloveniya «Mura» klubuna qarşı keçirilən oyundan (0:0) sonra jurnalistlərə bildirib.
Paytaxt klubunun baş məşqçisi rəqib komandanın hiyləgər addım atdığını və cavab qarşılaşmasında lazımı nəticəni qazanacaqlarını bildirib:
"Sloveniyada "Mura"nı məğlub etməyə çalışacağıq. Rəqibin məşqçisi dediklərinə gəlincə isə, guya onlar peşəkar komanda deyil, futbolçularının yarısından çoxunun klubla peşəkar müqaviləsi yoxdur. Amma mən onun fikirləriylə razı deyiləm. Əgər futbolçunun klubla müqaviləsi yoxdursa, həmin futbolçu UEFA yarışında edə bilməz. Avroliqada oynayan hər bir oyunçunun klubla müqaviləsi olmalıdır. Müqavilənin bir surəti isə UEFA-ya verilir. Onlar özlərini kasıb kimi göstərib ikinci hissədə bizim formayla meydana çıxmaqla guya kasıb komanda olduqlarını göstərmək istədilər. Əslində isə onlar kasıb deyillər. Fikrimcə, rəqib komanda bunu qabartmaqla hiyləgərlik edir».
