Nikola Yurçeviç: “Xorvatiya hələ də qrupun favoritidi”
15.10.2019 , 17:45
Azərbaycan millisinin xorvatiyalı baş məşqçisi Nikola Yurçeviç ölkəsinin mətbuatına açıqlama verib.
Korner.az xəbər verir ki, mütəxəssis AVRO-2020-nin seçmə mərhələsinin Macarıstanla səfər oyununda (0:1) baş hakim Dennis Hiqlerin 90+3-cü dəqiqədə yanlış qərar verməsindən danışıb:
“Daha öncə olduğum oyunlarda belə qərarın verildiyini xatırlamıram. Öncə mərkəzi göstərdi, futbolçumuz təmiz qol vurmuşdu. Daha sonra isə qərarı dəyişdi. Matçdan sonra hakim qolun təmiz olduğunu söylədi, amma bunu heç bir səbəb olmadan ləğv etmişdi. Oyun bitəndən yarım saat sonra mənə yaxınlaşdı və dedi ki, səhvimi gördüm, yanlış qərar verdim, üzgünəm və bu, mənim səhvimdi. Hiqler gənc və yaxşı hakimdi.
Bu qol bizim qrupdakı yerimiz üçün böyük əhəmiyyət kəsb etmirdi. Ancaq xal qazanmaq istəyirdik. Bu qol həm də Xorvatiyaya yardım edəcəkdi və onlar final mərhələsinə yüksələcəkdi. Xorvatiya hələ də qrupun favoritidi. Onların sonda lazım olanı reallaşdıra biləcəyinə inanıram.
Hamı bizdən xallar götürsə də, biz əlimizdən gələni etməyə davam edəcəyik. Xorvatiyanı büdrətdik, Macarıstandan da bir xal götürə bilərdik. Uels və Slovakiyanı təəccübləndirməyə çalışacağıq”.
