“Bakı”nın sabiq futbolçusu Nenad Kovaçeviç Fransa mətbuatına müsahibə verib.
Korner.az-ın məlumatına görə, müsahibədə o, klubun prezidenti, hazırda Fransa “Lans”ının da sahibi olan Hafiz Məmmədov və Azərbaycan Premyer Liqası barədə fikirlərini açıqlayıb.
Beş il “Lans”ın şərəfini qoruyan Kovaçeviç bildirib ki, Azərbaycanda cəmi bir mövsüm oynasa da, Premyer Liqamız onun üçün yaxşı təcrübə olub. “Azərbaycan çempionatında istədiyin kimi çıxış etmək asan deyil. Futbolçuların çoxunun fərdi ustalığı yüksək olmasa da, meydanda komanda oyunu var” – deyən N.Kovaçeviç H.Məmmədov haqda danışarkən isə bunları söyləyib:
“O, mənim prezidentim olub. Məmmədov “Bakı”nın hər bir oyunçusuna hörmət edirdi. Onunla iki-üç dəfə görüşmüşəm. Əsasən Hafiz Məmmədovun qardaşı ilə (Zeynal Məmmədov nəzərdə tutulur – red.) ünsiyyətdə olurduq. Hafiz Məmmədovun “Lans”a sahib olması yaxşı haldır. O, xeyirxah insandır. “Lans”ı inkişaf etdirəcəyinə inanıram” – deyə o vurğulayıb.
Qeyd edək ki, hazırda Kovaçeviç Fransa ikinci liqasında yarışan “Nimes Olimpik” klubunda çıxış edir.