"Artıq bir həftədir ki, komandamız Avstriyada hazırlıq keçir. "Neftçi"nin düşərgəsində əla abu-hava var və komandanın direktoru kimi bu, məni sevindirir".
Korner.az-ın məlumatına görə, bu sözləri "Neftçi"nin idman direktoru Güloğlan Cabbarov deyib. Klubun rəsmi saytına danışan Cabbarov azarkeşlərin yeni mövsümdə daha güclü komanda görəcəklərini bildirib:
"Futbolçularımızda nizam-intizam yüksək səviyyədədi. Yeni transfer etdiyimiz oyunçular da kollektivə uyğunlaşmağa başlayıblar. Onların gəlişindən sonra komandamız daha da güclənib. Heyətdəki gənc futbolçularımız da səylə çalışaraq, özlərini yaxşı tərəfdən göstərə bilirlər. Əminlikə deyirəm ki, heyətdə hər mövqe uğrunda güclü rəqabət var və ötən mövsümlə müqayisədə azarkeşlər daha güclü "Neftçi" görəcəklər".
Sonda isə klub rəsmisi azarkeşlərə səslənib: "Çempionlar Liqasında ilk oyunumuza qədər tam hazır olacağıq və uğur qazanaraq, azarkeşlərimizi sevindirəcəyik. Amma, onlar da unutmasın ki, "Neftçi"nin "Zestafoni" ilə oyununda azarkeş dəstəyinə ehtiyacı var. Ümid edirəm, fanatlar "Dalğa Arena"da "Neftçi"ni tək qoymayacaqlar. Odur ki, bütün azarkeşlərimizi indidən matça dəvət edirəm".
