Avropa çempionatında uğursuz çıxış edərək turniri xalsız başa vuran Hollandiya millisində yeni baş məşqçi təyinatı gerçəkləşib. Korner.az-ın məlumatına görə, İspaniyanın “Barselona”, Hollandiyanın “Ayaks” və Almaniyanın “Bavariya” komandalarının sabiq baş məşqçisi Lui van Qal bundan sonra Hollandiya yığmasına başçılıq edəcək.
Mütəxəssislə müqavilə bu ilin avqustunda qüvvəyə minir. Müqavilə 2014-cü ildə Braziliyada keçiriləcək dünya çempionatı başa çatana kimi qüvvədə olacaq.
Qeyd edək ki, Lui van Qal bundan əvvəl 2000-2002-ci illərdə milli komandanın baş məşqçisi postunu tutub. Lakin o, həmin vaxt komandanı Yaponiya və Koreyada keçirilən dünya çempionatının finalına çıxarmağı bacarmayıb.