“Neftçi” XX tur çərçivəsində keçirilən “Xəzər Lənkəran”-“Neftçi” matçından sonra AFFA İntizam Komitəsinin çıxardığı bəzi qərarlarla razılaşmayaraq AFFA-nın Apellyasiya və Ekspert Komitəsinə rəsmi şikayət məktubu ünvanlayıb.
Korner.az-ın məlumatına görə, etiraz məktubunda bir sıra maraqlı məqamlar öz əksini tapıb. Belə ki, “Neftçi”nin bir neçə futbolçusu oyunun baş hakimi Rəhim Həsənov tərəfindən matç zamanı dəfələrlə təhqir edildiklərini iddia ediblər və buna görə də hakimin cəzalanmasını tələb ediblər.
Bundan başqa etiraz məktubunda “Neftçi”nin bir neçə futbolçusuna verilən qırmızı vərəqənin ləğv edilməsi də yer alıb. Xatırladaq ki, “Xəzər Lənkəran” “Neftçi” matçında 3 futbolçu- Tərlan Quliyev, Karlos Kardozo və Bruno Bertuççi qırmızı vərəqə alıblar. Mahir Şükürov isə azarkeşlərə göstərdiyi qeyri-etik əl hərəkətinə görə cəzalanıb.
Bu məsələni maraqlı edən faktlardan biri də futbolçuları təhqir etdiyi iddia edilən hakim Rəhim Həsənovun XXI turun heç bir oyununa təyinat almamasıdır. Bu fakt artıq Həsənovun cəzalandırılması kimi qiymətləndirilə bilər.
qafqazinfo.az
