"Neftçi"nin Çempionlar Liqasındakı rəqibi Albaniyanın "Skenderbeu" klubu növbəti transferini reallaşdırıb.
Korner.az-ın məlumatına görə, "ağ-qaralar"ın rəqibi "Şkendija"dan Muzafer Ecupini rəsmən heyətinə qatıb.
Makedoniya çempionatının ikinci ən sərrast hücumçusu olan 25 yaşlı futbolçu cari mövsümdə meydana çıxdığı 30 matçda 19 qol vurub.
Forvard cari mövsümdə göstərdiyi oyun ilə xarici klubların da diqqətini çəkib. Lakin Korçe təmsilçisi hamıdan cəld tərpənərək, məsələni xeyrinə həll edə bilib.
Muzafer Ecupi 2012-ci ildə Makedoniya millisinin formasını da geyinib. Bundan əlavə o, ölkəsinin 21 yaşlılardan ibarət komandasının da şərəfini qoruyub.
Səxavət QURBANOV