“Neftçi”nin U-14 komandasının Rusiyanın Krasnodar şəhərində keçirilən “Dəri top” turnirində separatçı rejimi təmsil edən “Barsalan” (Cənubi Osetiya) və “Qudauta” (Abxaziya) klublarıyla qarşılaşması son iki günün əsas müzakirə mövzusudur.
Korner.az məsələyə “ağ-qaralar”ın rəsmi mövqeyini öyrənmək üçün klubun Mətbuat və İctimaiyyətlə Əlaqələr Departamentinin rəisi vəzifəsini icra edən Mehman Rəsulovla əlaqə saxlayıb.
Rəsulov ona ünvanladığımız “turnirin iştirakçıları barədə əvvəlcədən məlumatınız var idimi” sualına bir cümləlik cavab verməklə kifayətləndi: “Gəlin uşaq futbolçularımızın qələbəsinə kölgə salmayaq”. İsrarlarımıza baxmayaraq rəis əvəzi əlavə heç nə deməyincə klubun icraçı direktoru Elnur Məmmədovla əlaqə saxladıq. Bu dəfə də müsbət nəticə hasil olmadı: Mpenza məsələsinə görə Sürixdə səfərdə olan Elnur bəy telefon zənglərimizi cavabsız qoydu.
