Bu gün "Neftçi"nin 22 yaşlı braziliyalı futbolçu Bruno Bertuççi ilə müqavilə imzaladığı haqda xəbər vermişdik. Məlumat rəsmi şəkildə təsdiqlənib. Bu barədə klubdan göndərilən məktubda deyilir:
"Neftçi" PFK növbəti transferini həyata keçirib. Flaqman braziliyalı futbolçu Bruno Bertuççini heyətə qatıb. Bu gün komandanın məskunlaşdığı Bolu şəhərində "Neftçi" PFK-nın prezidenti Sadıq Sadıqovun iştirakı ilə rəsmi imzalanma mərasimi baş tutub. Tədbirdə çıxış edən Sadıq Sadıqov 22 yaşlı futbolçuya uğurlar arzulayıb: "Bizim əsas məqsədimiz Azərbaycan futbolunun inkişafına töhfə verməkdir. Buna görə də "Neftçi"yə hər zaman yalnız səviyyəli, legionerlər cəlb etməyə çalışırıq. Bruno Bertuççi Braziliyanın U-21 komandasında oynayır, gənc olmasına baxmayaraq Avropa təcrübəsi görüb. İnanıram ki, o gözəl oyunu ilə komandamızın qələbələrində pay sahibi olacaq. Bruno Bertuççi də öz növbəsində “Neftçi"nin uğurları üçün çalışacağını bildirib: "Mən hədəfim həmişə iddalı klublarda çıxış etmək olub. Braziliyanın gənclərdən ibarət yığmasında da çıxış etmişəm. Bilirəm ki, "Neftçi" Azərbaycanın ən köklü və böyük tarixi olan klubudur. Belə komandada oynamaq mənim üçün böyük qürurdur. "Neftçi" kimi iddalı klubun Çempionlar Liqasında və Azərbaycan çempionatında uğur qazanması üçün əlimdən gələni edəcəyəm. Daha sonra "Neftçi" PFK-nın prezidenti Sadıq Sadıqov yeni transfer Bruno Bertuççiyə 16 nömrəli futbolkanı təqdim edib".
