"Neftçi"nin mətbuat xidmətinin rəhbəri Gündüz Abbaszadə bu gün baş tutan "Böyük oyun"dan əvvəl və sonra yaşanan hadisələrlə bağlı fikirlərini bildirib.
Korner.az-a danışan "ağ-qaralar"ın rəsmisi Lənkəranda baş verən olaylara hələ də inanmadığını və bu hadisələrin məhz onları istəməyən qüvvələr tərəfindən edildiyini bildirib:
"Bugünkü oyundan əvvəl azarkeşlər arasında baş verən davaya səbəb "Xəzər Lənkəran"ın bəzi azarkeşləri olub. Onlar bizim azarkeşlərə söz ataraq davaya səbəb olublar. Bundan əlavə, matçın başlamasına az vaxt qalmış yerli fanatların bir qismi komandamızın baş məşqçisi Böyükağa Hacıyevin əleyhinə söyüş, pis ifadələr işlədiblər. Mən hər zaman "Xəzər Lənkəran" azarkeşlərini tərifləmişəm və onların ölkədə bir nömrə olduqlarını demişəm. Ancaq bugünkü hadisələrdən sonra onlar mənim yanıldığımı isbatladı. Bu gün bizim meydana Avropa Liqasının loqosu ilə çıxmağımız və avrokuboklarda göstərdiyimiz uğurlu nəticələr çoxları tərəfindən paxıllıqla qarşılanır. Bunun adı gözügötürməməzlikdi. Oyundan sonra keçirilən mətbuat konfransında baş verən hadisəyə gəlincə isə, həmin jurnalist ora öyrədilb göndərilmişdi.
Biz bu oyunu uduzduq. Ancaq bundan sonra qollarımızı "çırmalayıb" yeni-yeni qələbələr qazanaraq, yenidən çempion olacağıq. Yenidən "Neftçi"nin nəyə qadir olduğunu götərəcəyik".
