“Neftçi” Peşəkar Futbol Klubunun prezidenti Sadıq Sadıqovun rəhbərliyi ilə klubdaxili iclas keçirilib.
Korner.az klubun saytına istinadən xəbər verir ki, toplantıda Avropa Liqası və daxili çempionatda çıxışla bağlı müzakirələr aparılıb.
Məşqçilər korpusu “Rubin” və “Rəvan”a məğlubiyyətlərlə bağlı Sadıq Sadıqova hesabat verib. Həmin yenilgilərə əsas səbəblər kimi aşağıdakılar göstərilib:
1. Müxtəlif yaş qrupları üzrə, eləcə də əsas milli komandanın təlim-məşq toplanışları səbəbindən çempionatda yaranan fasilələr və bunun nəticəsində Topaz Premyer Liqasının təqvimində əmələ gələn sıxlıq.
2. Çempionatın təqvimi tərtib olunarkən, Avrokubokların qrup mərhələsinin oyunlarının nəzərə alınmaması.
3. Bunların məntiqli nəticəsi kimi, Avropa Liqası turnirindəki Azərbaycanın yeganə təmsilçisi “Neftçi”nin oyunlarını sıx qrafikdə keçirməsi.
Üstəlik, “Neftçi” əsas hədəf kimi Azərbaycanı Avropa Liqasında layiqincə təmsil etməklə yanaşı, gənc futbolçuların inkişafı strategiyasını seçib.
Klub prezidenti Sadıq Sadıqov, rəhbərliyi və məşqçilər korpusunu dinlədikdən sonra, fikirlərini bildirərək Azərbaycan futbolunda ilk dəfə tarixi uğura imza atmış klubun rəsmilərinin və məşqçilər korpusunun istefalarını qəbul etməyib.
Bundan başqa, klub prezidenti obyektiv səbəbləri nəzərə alaraq, buraxılan səhvlərin qısa zamanda aradan qaldırılmasını tələb edib.
“Neftçi” PFK bu mövsüm də yalnız çempionluğu və avrokuboklarda yeni uğurların qazanılmasını hədəfləyir. Buna görə də klub prezidenti Sadıq Sadıqovun tapşırığı ilə qərara alınıb ki, klubun yeni inkişaf strategiyası planı hazırlansın. Həmçinin heyətin gücləndirilməsi üçün transfer dönəmində “Neftçi”yə yeni futbolçular cəlb olunsun.
