“Neftçi” mayın 28-də Azərbaycan kubokunun finalında “Xəzər Lənkəran”la oyuna mütləq rekordçu olmaq üçün çıxacaq.
Korner.az apasport.az-a istinadən xəbər verir ki, “ağ-qaralar” 5-ci dəfə ölkə kubokunu əldə edərsə, bunu ən çox qazanan komanda olacaq.
Belə ki, “Neftçi” hazırda “Kəpəz”lə birgə kubokun ən çox – 4 dəfə qalibi olmağına görə şərikli liderdir. “Ağ-qaralar” buna 1995, 1996, 1999 və 2004-cü ildə nail olub. Yəni göründüyü kimi, “Neftçi” 9 ildir Azərbaycan kubokuna həsrət qalıb. Komanda ötən il finala çıxsa da, “Bakı”ya uduzmaqla şansını əldən verdi.
“Xəzər Lənkəran” isə kuboku qazanarsa, 4-cü dəfə qalib olmağı ilə prinsipial rəqibinə çatacaq. Cənublular 9 illik tarixində 2007, 2008 və 2011-ci ildə kuboka yiyələniblər.
Prinsipial rəqiblər çempionatda çox üzləşsələr də, kubokda cəmi 1 dəfə rəqib olublar. Bu, elə lənkəranlıların son dəfə qalib olduğu 2010/11 mövsümündə gerçəkləşib. Həmin vaxt 1/4 finalda yolları kəsişən komandalar arasında Bakıda qol şousu oldu ki, “Xəzər Lənkəran” 4:3 hesablı qələbə ilə yarımfinala doğru addım atdı. Bakılılar cavab matçında 1:1 hesablı bərabərliyə qalmaqla, məğlubiyyətin əvəzini çıxa bilmədi. Həmin oyunda “Xəzər Lənkəran”ın heyətində fərqlənən Syerra-Leonedən olan yarımmüdafiəçi Juilus Vobay hazırda əks düşərgədədir.
“Xəzər Lənkəran” medallar uğrunda mübarizədən kənarda qalandan sonra “Neftçi” ilə “altılıq”da “Böyük oyun” olmasa da, bunun kuboka təsadüf etməyi mövsümün belə prinsipial, maraqlı matçla başa çatmağına imkan yaratdı.
Qeyd edək ki, kubokun 3 dəfə qalibi olan “Bakı” ilə “Qarabağ” mübarizəni yarımfinalda dayandırdı.
