Topaz Premyer Liqasının geridə qalan 18 turu ərzində azarkeşlər 238 qola şahidlik edib.
Gərgin keçən qarşılaşmalarda komandalardan bəziləri ilk, bəziləri isə ikinci hissədə coşub.
"Neftçi" aman vermir…
Premyer Liqanın geridə qalan turları ərzində ilk hissədə ən çox qol vuran komandası "Neftçi"di. Belə ki, "ağ-qaralar" ilk hissədə, əsasəndə ilk hissənin ilk 15 dəqiqəsində rəqiblərinin qapısına yol tapır. Paytaxt təmsilçisi 18 tur ərzində 11 dəfə ilk hissədə rəqib qapıçılarını məyus etməyi bacarıb. "Ağ-qaralardan" cəmi bir hissədə az qol vuran "Qəbələ" 10 dəfə ilk hissədə qol sevinci yaşayan komanda olub."Neftçi"nin əzəli rəqibi "Xəzər Lənkəran" isə 9 dəfə ilk hissədə rəqib qapılarına yol tapmağı bacarıb. Beləliklə ilk hissənin ən qorxunc komandası "Neftçi"di.
"Simurq"a sonradan çatır…
İkinci yarıda isə bu göstərici "Simurq"a aiddi. Zaqatala təmsilçisi ikinci yarıda oyunun taleyini həll etməyi bacarır. Georgi Çixradzenin rəhbərlik etdiyi komanda geridə qalan 18 tur ərzində ilk hissədə Premyer Liada ən az qolu "Simurq" vurubsa, ikinci yarıda bu göstərici tam əksi olaraq zaqatalalıların xeyrinə işləyir. "Simurq" geridə qalan turlarda 12 dəfə ikinci hissədə rəqiblərini məyus etməyi bacarıb.
Premyer Liqanın ilk hissədə ən çox heç-heçə edən komandası isə, "Kəpəz"di. Gəncə təmsilçisi bir hissə rəqibləri önündə tab gətirsə də, ikinci yarıda ya özü, ya da rəqib 3 xalı qazanan tərəf olur.
Cənublulardan nə gözləsən olar
"Xəzər Lənkəran" isə 18 tur ərzində ilk və ya ikinci hissədə 17 dəfə ya özü, ya rəqibi qol vurur. Qısacası Cənub təmsilçisi istər ilk hissə, istərsə də ikinci yarıda heç-heçə oynamağı sevmir. Buna görə də, "ağ-yaşıllar" sürpriz komandadı. İstənilən hal da rəqiblərinin qapısına yol tapa bilər.
Ümumiyyətlə Premyer Liqada komandalar ilk hissədə 81, ikinci yarıda isə 94 dəfə fərqləniblər. İlk hissədə 18 tur ərzində 38 heç-heçə qeydə alınıb.
Bu göstəricilərdən sonra belə qənaətə gəlmək olar ki, "Neftçi"dən ilk yarı, "Simurq"dan ikinci hissə çəkinməyə dəyər.
Səxavət QURBANOV
