“Neftçi”nin Qazaxıstanın “Aktobe” klubu ilə keçirəcəyi yoxlama oyunu baş tutmayacaq.
Korner.az-ın məlumatına görə, bu barədə “Aktobe”nin rəsmi saytı məlumat yayıb. Xəbərdə bildirilir ki, yanvarın 18-nə planlaşdırılan matç “Neftçi”nin imtinası üzündən baş tutmayacaq.
Hazırda Qazaxıstan komandasının heyətində Ermənistan yığmasının müdafiəçisi Robert Arzumanyan çıxış edir. Habelə, düşmən ölkə millisinin müdafiəçisi Levon Ayrapetyan ilə yarımmüdafiəçisi Maros Pizzelli də “Aktobe”də baxışdadı. Oyun isə yanvarın 18-də keçirilməli idi.
“Neftçi”nin Mətbuat və İctimaiyyətlə Əlaqələr Departamentinin rəhbəri Gündüz Abbaszadə açıqlamasında “Aktobe” ilə görüşdən imtina etdiklərini təsdiqləyib. O, Türkiyə “Fənərbaxça”sı ilə də yoldaşlıq görüşünün vaxtının dəyişdirilərək, eyni günə salınmasını səbəb göstərib: “Əslində “Fənərbaxça” ilə yanvarın 17-də qarşılaşmalı idik. Amma sonradan oyun bir gün sonraya, saat 22.00-a salındı. “Aktobe” ilə oyunumuz isə yanvarın 18-də saat 16.00-da başlamalı idi. “Fənər” önünə əsas, “Aktobe”yə qarşı isə daha çox ehtiyatda qalan oyunçularımızı buraxmaq istəyirdik. Hər iki matç “Mardan” stadionunda baş tutmalı idi. Amma “Fənər”lə oyunumuzun biletləri satışa çıxarılarkən, qarşılaşmaya marağın böyük olduğu üzə çıxıb. Bu səbəbdən, stadion rəhbərliyi təhlükəsizlik tədbirlərini gücləndirməyi və həmin gün “Mardan”da başqa bir görüşün keçirilməməsini qərara alıb. Ona görə də “Aktobe” ilə oyundan imtina etməli olduq”.
“Aktobe”nin heyətində erməni futbolçuların yer alması səbəbindən “Neftçi”nin oyuna çıxmaq istəmədiyi barədə ehtimallara gəldikdə, Abbaszadə bunu əsassız adlandırıb. O bildirib ki, flaqman üçün rəqibin heyətində erməninin yer alıb-almamasının fərqi yoxdu və komanda bütün oyunlara qələbə üçün çıxır.
lent.az
