“Necə müdafiə olunacağımızı yaxşı bilirdik” – Aftandil Hacıyev
29.11.2020 , 20:41
“Səbail”in baş məşqçisi Aftandil Hacıyev Azərbaycan Premyer Liqasının XI turunda “Qarabağ”la keçirililən (1:1) oyundan sonra təşkil olunan mətbuat kobfransında matçla bağlı fikirlərini bildirib.
Korner.az xəbər verir ki, mütəxəssis oyunu belə şərh edib:
“Sevincli, tarixi günlər yaşayırıq. Torpaqlarımızın qayıtması hamımızı sevindirir. Xüsusilə “Qarabağ” klubunu təbrik edirəm. Ev oyununu “İmarət”də keçirmək üçün gözəl fürsət yaranıb.
Koronavirus çempionatda ən çox bizə təsir edib. Bu gün əsas heyətin 4 futbolçusu meydana çıxa bilmədi. İtkilərə baxmayaraq, ən yaxşı oyunlarımızdan birini keçirdik. İlk hissədə yaxşı qol imkanımız olsa da, istifadə edə bilmədik. İkinci yarıda fərqləndik, amma təzyiqə davam gətirə bilmədik. Buna baxmayaraq, 1 xal qazandıq. Nəzərə alaq, son vaxtların ən yaxşı komandası ilə oynadıq. İnanıram ki, yuxarı sıralara yüksələcəyik.
Bəzən rəqib səni müdafiə olunmağa məcbur edir. Necə müdafiə olunacağımızı yaxşı bilirdik. Yəqin razılaşarsınız ki, bu gün ancaq müdafiədə oturmadıq. “Qarabağ”ın üstün cəhətlərini analiz edib futbolçularıma başa salmışdım”.
