“Araz Naxçıvan”ın əsas azarkeş klubu “Nəqşicahan” Muxtar Respublika təmsilçisinin sonuncu tur çərçivəsində “Lokomotiv”ə qarşı keçirdiyi oyunu boykot edib. Fan-klubu bu addımı atmağa vadar edən isə komandanın qorxaq oyun nümayiş etdirməsidi.
Fan-klubun rəhbəri Yağmur Firuzoğlu Korner.az-a açıqlamasında bildirib ki, komanda çempionluğa layiq oyun nümayiş etdirmir: “Vahid lider olan komanda hər oyunda ən azı 2-3 top fərqiylə udmalıdı. Biz isə 1:0 kimi minmal hesabla qalib gəlirik. “Araz Naxçıvan”a belə oyun yaraşmadığını dilə gətirmək üçün oyunu boykot etdik”.
“Nəqşicahan”ın başqanından boykotun nəvaxtadək davam edəcəyini də soruşduq: “Bu barədə yaxın günlərdə keçiriləcək İdarə Heyətinin iclasında qərar veriləcək”.
Xatırladaq ki, “Araz Naxçıvan” son oyunda “Lokomotiv”i 3:1 hesabıyla məğlub edib.
