“Müstəqil Ağdamın təmsilçisi kimi ilk kubokumuzu qazandıq”
17.05.2022 , 16:46
“Qarabağ”ın prezidenti Tahir Gözəl açıqlama verib.
Korner.az xəbər verir ki, o bunları deyib:
“Başda klubumuz olmaqla, hər kəsi çempionluq münasibətilə təbrik edirəm. Müstəqil Ağdamın təmsilçisi kimi ilk kubokumuzu qazandıq. 2021-ci ildən bu fikirləri səsləndirirdik ki, xəyalımız Qarabağa getmək, qələbəmizi öz vətənimizdə qeyd etməkdir. Artıq buna nail olduq. Təbii ki, bu, Cənab Prezidentin, xalqımızın sayəsində gerçəkləşən möcüzədir. Hələ də inanmaqda çətinlik çəkirəm. Şükürlər olsun ki, bunu bacardıq. Ona görə də mənim üçün heç vaxt unudulmayacaq qalibiyyətdir. “Qarabağ” tarixində bir çox ilklərə imza atmış komandadır. İnanıram ki, bu sabitlik və təcrübə ilə yenə də Çempionlar Liqasında qrupa düşərik”.
Klub rəhbəri tədbirdən sonra Qurban Qurbanovla görüşüb transfer məsələlərini müzakirə edəcəklərini vurğulayıb: “Bizdə tamamilə peşəkar idarəetmə sistemi var. Baş məşqçi ilə ümumi durumu dəyərləndirəcəyik. Amma vaxtımız çox azdır. Bu da bizə radikal dəyişikliklərə imkan vermir. Bəzi futbolçularımızla danışıqlar davam edir. Onları saxlamaq alınıb-alınmayacaq, bilinmir. Bunun həyəcanını yaşayırıq. Artıq komandanın özəyi formalaşıb. Bu sabitliklə yenidən iddialı olacağımıza inanıram”.
