Paytaxtın “Keşlə” klubu Antalyada hazırlıqlarını davam etdirir. Qəsəbə təmsilçilərinin yeni transferi Məqsəd İsayev Antalyaya ezam olunmuş əməkdaşımızın suallarını cavablandırıb. Türkiyədəki təlim-məşq toplanışı haqda danışan müdafiəçi bunları bildirib:
– Komandanın hazırlıq prosesi necə gedir? Səni qane edirmi?
– Hər şey çox yaxşıdır. Elə gün olur iki məşq edirik, elə gün də olur ki, bir. Ümid edirəm , burada çəkdiyimiz əziyyətin bəhrəsini çempionatda görəcəyik.
– Yeni komanda, yeni məşqçi və yeni heyət formalaşır. Anlaşma ptoblemi yaşamırsan ki ?
– Yox, uşaqlar qabağcadan tanıdığım futbolçulardır. Komandaya da öyrəşirəm.
– Digər komanda yoldaşların, Yuri Maksimovun fiziki yükləmələrə üstünlük verdiyini deyir. Sən necə fikirləşirsən ?
– Deməzdim tam olaraq fiziki yükləmələrə üstünlük verir. Düzdür, Bakıda ağır məşqlərimiz oldu. Bura gəldikdən sonra hər-tərəfli olaraq çalışırıq. Düşünürəm ki, ağır məşqlərin çoxu qaldı Bakıda. Burada da çox çalışırıq. İnşallah da yaxşı olacaq.
–“Neftçi”də bir neçə məşqçi ilə işləmisən. Necə düşünürsən, bu məşqçi ilə və bu heyətlə Premyer Liqada uğur qazanmaq olarmı?
– Bunu zaman göstərəcək. Uğur qazanmaq üçün hər kəs yaxşı olmalıdır. Təkcə məşqçidən asılı olab hal deyil bu. Biz də əlimizdən gələni edəcəyik.
– Səncə, mövsümün sonunda, hazırkı “Keşlə” ilə hansı yerə ümid etmək olar?
– Demirəm ilk üçlükdə, ancaq çalışacağıq ki, ən azı “5-lik”də olaq. Bizim üçün ən əsas kubok oyunudur. Çünki Avropa Liqasına vəsiqəni əldə etmək istəyirik. Ən əsas məqsədimiz budur.
– İki cəbhədə mübarizə aparmaq çətin olmayacaq ki?
– Kubok oyunu iki oyundan ibarətdir. Elə də çox deyil, lakin çempionat oyunları çox olur. Ümumilikdə isə, hər ikisində çalışacağıq ki, yaxşı oyun sərgiləyək.
– Deyirsən, kubok oyunu bizə vacibdir. Səncə, “Qarabağ” daha təhlükəli rəqib idi, yoxsa “Sumqayıt”? Bir tərəfdə titullara doymuş , güclü bir komanda, digər tərəfdə isə, gənc və perspektivli klub.
– “Qarabağ” güclü klubdur. Düzdür “Sumqayıt”a uduzdular, lakin deməzdim zəifdirlər. Ümumilikdə isə bizim üçün heç bir fərqi yoxdur. Kim olsa, var gücümüzlə oynayacağıq.
– Yaxın zamanlarda milli komandanın heyəti açıqlandı. Kamran Ağayevi çıxmaq şərtiylə, klubdan heç kəs yığmaya dəvət olunmadı. Necə düşünürsən, bunun komandaya hər hansı bir təsiri oldumu? Buna reaksiya necədir klubda?
– Düzdür, Kamran Ağayev milliyə dəvət olunub. Lakin digər oyunçular dəvət olunmaması özümüzdən asılıdır. Nə qədər yaxşı oynasaq, şanslarımız da bir o qədər artacaq.
Məmmədov İlkin, Antalya
