“Xəzər Lənkəran” klubunun fəxri prezidenti Mübariz Mənsimov Avropa Liqasının I təsnifat mərhələsi çərçivəsində “Slima” ilə Maltada keçirilən görüşdən (1:1) sonra müsahibə verib.
– Mübariz bəy, görüşün nəticəsi sizin üçün sürpriz olmadı ki?
– “Xəzər Lənkəran”ın qələbə qazanması lazım idi. Çünki mən rəqibi güclü hesab etmirdim. İdmanda şans amili də var. İnşallah, cavab matçından sonra növbəti mərhələyə biz keçərik.
– “Xəzər Lənkəran”ın “Slima”dan aşkar güclü olması fikri ilə razısınız?
– Əlbəttə.
– Gələn il komandanızın 10 yaşı olacaq. Yubileylə əlaqədar Con Toşak kimi adlı-sanlı mütəxəssisi baş məşqçi postuna gətirdiniz. Bundan sonra məşhur futbolçuların da transfer ediləcəyi gözlənilsə də, hələlik bu baş vermədi…
– Mən Con Toşaka güvənirəm. Uelsli məşqçinin karyerası çoxlarına bəllidir. Toşakın Azərbaycana gəlməsi böyük bir şansdır. Özünüz də gördünüz. Bu gün komanda Toşakın rəhbərliyi altında rəqibdən çəkinmədi, qorxmadan mübarizə apardı. Bu, önəmli amildi.
– Belə çıxır ki, “Xəzər Lənkəran”ın çıxışı sizi qane edib…
– Məni qane eləməyən yalnız bir məqam var. O da rəqibdən güclü olduğumuz halda qələbə qazana bilməməyimizdir. Biz hər şeydə “Slima”dan güclüyük. İstər büdcə, istərsə də digər cəhətlərdə.
– Ola bilərmi ki, qələbəni əldən verilməsinə səbəb futbolçularda yaranan arxayınçılıq oldu?
– Mümkündü, bəlkə də rəqibi zəif hesab edib bizim futbolçularda arxayınlaşma yaranıb. Bütün bunlara baxmayaraq, Lənkərandakı qarşılaşmada mərhələ keçəcəyimizi düşünürəm.
– Növbəti mövsüm üçün komandanızdan nə gözləyirsiniz?
– Təbii ki, çempionluq. Gələn il komandamızın yubileyidir. Bu səbəbdən bizi yalnız qızıl medallar qane edəcək.
– Ölkə kubokunun finalında yaranan qalmaqaldan sonra haqqınızda müxtəlif fikirlər səsləndirildi…
– Bilirsiz, mən ölkə futbolunun inkişaf etdiyinə inanıram. Azərbaycan dövləti və AFFA rəhbərliyinin düzgün yolda olduğuna inanıram. Mətbuatda yazılanlara gəlincə, tutaq ki, “Neftçi”nin qapıçısı həmin oyunda özünü yaxşı aparmadı və s. bu kimi hadisələr xırda şeylərdi. Fikrimcə, “Xəzər Lənkəran” penaltilər seriyasınadək qələbəni təmin etməli idi.
– Final matçından sonra komandanıza qarşı haqsızlıq edilməsi fikri ilə razısınız?
– Keçmişə yox, gələcəyə baxmaq lazımdı.
apasport.az
<span style=""font-family:Arial," helvetica,="" sans-serif;line-height:normal;font-size:14px;"="">
